Bilim mınıstri Aqmola óńiriniń ustazdarymen jáne stýdenttermen kezdesti
KÓKShETAÝ. QazAqparat - QR Bilim jáne ǵylym mınıstri Kúlásh Shámshıdınova Aqmola oblysynda bilim ordalaryn aralap, Shoqan Ýálıhanov atyndaǵy Kókshetaý memlekettik ýnıversıtetinde pedagogtarmen jáne stýdenttermen kezdesti, dep habarlaıdy QazAqparat tilshisi.
Sapar barysynda JOO stýdentteri mınıstrdi «Uly dalanyń jeti qyry» taqyrybymen uıymdastyrylǵan kórmeniń maqsattarymen tanystyrdy.
K.Shámshıdınova sondaı-aq ıAMR spektroskopııa zerthanasynda boldy. Onda ǵalymdar ıadrolyq magnıttik rezonanstyq qubylysty paıdalana otyryp, spektroskopııalyq ádispen hımııalyq obektilerdi zertteıdi.
Úkimet músheleri, sonymen qatar medıtsına fakýltetiniń sımýlıatsııalyq ortalyǵynyń, halyqaralyq baǵdarlamalar ortalyǵynyń jáne medıtsınalyq tehnologııalardyń 3D laboratorııasynyń jumysymen tanysty. Onda dárister aǵylshyn tilinde júrgiziledi.
Ýnıversıtet ujymymen, bilim alýshylarmen kezdesý barysynda mınıstr bilim sapasyn arttyrýdaǵy basymdy baǵyttarǵa toqtaldy. Sondaı-aq, oqý aǵartý salasyndaǵy tyń ózgerister men aldaǵy ýaqytta mınıstrlik tarapynan atqarylatyn aýqymdy jumystar josparyn tilge tıek etti.
Sharaǵa qatysqan ýnıversıtet ustazdary men stýdent-jastar ózderin tolǵandyryp júrgen máseleler boıynsha saýaldaryn qoıyp, olarǵa naqty da tushymdy jaýaptar aldy.
Ýnıversıtet professory Bárııa Badyqqyzy bilim salasyndaǵy búgingi túıtkildi meseleler men olqylyqtarǵa toqtalyp, olardyń bolashaqta oń sheshim tabatynyna úmit bildirdi.
Óz kezeginde Bilim mınıstri Shoqan Ýálıhanov ýnıversıtetiniń rektory Marat Syrlybaevtyń rektorlyq qyzmetine sáttilik, ustazdar qaýymyna shyǵarmashylyq tabys, al stýdent-jastarǵa elmizdiń damyp-órkendeýine óz úlesterin qosatyn bilimdi de bilikti maman bolýlaryna tilektestik bildirdi.
Eske salaıyq, QR Premer-Mınıstriniń orynbasary Gúlshara Ábdiqalyqova bastaǵan Úkimet músheleri osy kúnderi jumys saparymen Aqmola óńirinde júr.
Olar az qamtylǵan jáne kópbalaly otbasylarymen kezdesip, olarǵa qoldaý sharalary jóninde keńinen túsindirýde.
