Bilim mınıstri A.Sárinjipov Qyzdar ýnıversıtetinde boldy (FOTO)
ASTANA. QazAqparat - 16 maýsym kúni QR Bilim jáne ǵylym mınıstri Aslan Sárinjipov jumys saparymen Qazaq memlekettik qyzdar pedagogıkalyq ýnıversıtetinde boldy. Onda mınıstr Qyzdar ýnıversıteti aýmaǵynda boı kóterip jatqan 450 oryndyq jańa jataqhanany, 32 oryndyq júzý basseınin aralap kórip, oqý ornynyń tynys-tirshiligimen tanysty. Sondaı-aq jýyrda ashylǵan «Qazaq Arýy» sýburqaǵy men qyzdar tarıhynan syr shertetin elimizdegi biregeı «Aqtumar» murajaıyn tamashalady.
Qyzdar ýnıversıtetiniń birinshi prorektory Bahodır Alıev qonaqtarǵa oqý orynnyń tynys-tirshiliginen habar beretin kórme zalymen, ótken jyly ashylǵan QR Tuńǵysh Prezıdenti saltanat zalymen tanystyrdy.
«Pedagog mamandardy daıarlaıtyn kıeli shańyraqta qazirgi tańda 700-den astam professorlyq-oqytýshylyq quram jumys jasaıdy. Kredıttik tehnologııa júıesi negizinde 41 mamandyq boıynsha 9 000-ǵa jýyq stýdent bilim alýda. Sondaı-aq 23 magıstrlik jáne 4 doktorantýra mamandyqtary boıynsha kadrlar daıyndalady. Ýnıversıtetimizdiń jetistikteri men úzdik kórsetkishteri baǵalanyp, 2013 jyly «Sala kóshbasshysy» Ulttyq sertıfıkatymen marapattaldy», - dedi B.Alıev.
Bilim shańyraǵynda 40-tan asa stýdenttik uıym men klýb bar. Elimizge áıgili «Aıgúl» ansambli, «Ular» ult aspaptar orkestri, «Tomırıs» bı toby, 150 adamnan turatyn úlken hor, «Óner - jastan» opera jáne «Jan saraıy» drama teatry, «Tek qana qyzdar» kóńildiler men tapqyrlar klýby jumys jasaıdy. Sońǵy bir jylda 86 stýdent ǵylymı-zertteý jumystary boıynsha bıikten kórinse, sport salasynda Maııa Maneza, Karına Gorıcheva, Muhıtova Aızada, Ádilnur Dıdar jáne basqa da kóptegen jeńimpaz qyzdardy bóle-jara aıtýǵa bolady.
Budan soń elimizdiń bas pedagogy zamanýı baǵytta jumys isteıtin ǵylymı zerthanalarmen jáne ýnıversıtet ǵalymdarynyń ashqan ǵylymı jańalyqtarymen tanysty. Onda túrli qural-jabdyqtardyń jumysyn tamashalaǵan mınıstr ınnovatsııalyq tehnologııalardy paıdalana otyryp tuńǵysh ret alynǵan ekologııalyq taza sabyndarǵa, «EKSPO-2017» kórmesine qoıylatyn shaǵyn gıdroelektrstansasy jobalaryna joǵary baǵa berdi.
Jumys saparynyń sońynda Qyzdar ýnıversıteti jumysyna rızashylyǵyn bildirgen Bilim jáne ǵylym mınıstri Aslan Sárinjipov basshylyqqa salynyp jatqan qurylys nysandaryn belgilengen merzimde aıaqtaýdy baqylaýǵa alýdy tabystap, birneshe tapsyrmalar berdi.
