Bilim men ekonomıkanyń dáýiri kele jatyr - N. Nazarbaev

ASTANA. 29 qarasha. QazAqparat - Bilim men ekonomıkanyń dáýiri kele jatyr. Búgin Astanada «Bolashaq» halyqaralyq stıpendııasynyń 20 jyldyq mereıtoıyna arnalǵan forým barysynda QR Prezıdenti Nursultan Nazarbaev osylaı aıtty.

Elbasynyń sózine qaraǵanda, bolashaqta dál osy bilim men ekonomıka - damýdyń sheshýshi faktory bolyp tabylady. «Bul rette biz úshin eń mańyzdysy jaratylys ǵylymdaryn damytý: fızıka, hımııa, bıologııa, matematıkany. Osy salalarda ınnovatsııa úshin taýsylmas áleýet bar», - dedi N. Nazarbaev. Sonymen qatar, Memleket basshysy el damýyna kreatıvtik serpin berýdiń asa mańyzdy ekenin atap ótti. Sondyqtan da, Qazaqstan ǵylymǵa burynǵydan da mol ınvestıtsııalar salyp jatyr. «Jańa zerthanalar ozyq qondyrǵylarmen jabdyqtalyp, salynýda. Qarjylandyrýdyń jańa júıesi júrgizilýde. Bizge osy áleýetti paıdalanatyn adamdar kerek», - deı kele Nursultan Nazarbaev EKSPO-2017 halyqaralyq kórmesi el damýyna jańa serpin beretinin atap ótti. «Bolashaq energııasy» atty taqyryppen ótetin osynaý halyqaralyq shara meniń oıymsha, «jańa ekonomıkaǵa» ótýdiń mańyzdy kezeńi bolady. Bul ekonomıka múldem basqa qondyrǵylardy, basqa ındýstrııa men basqa ónerkásipti talap etedi. Sondyqtan da, biz osyndaı múldem basqa, múldem jańa dúnıelerdi qoldana otyryp Qazaqstanda ındýstrııanyń qandaı bolýy kerektigine qatysty túsinikti túbegeıli ózgertýge tıispiz», - dedi Elbasy.