Bilim mekemelerinde «Táýelsizdiktiń 7 qyry» fılm toptamalary kórsetile bastady
Tuńǵysh Prezıdent kúni qarsańynda elimizdiń bilim berý mekemelerinde «Táýelsizdiktiń jeti qyry» derekti fılmder toptamasy kórsetile bastady. Olardyń negizinde synyp saǵaty, ashyq sabaq, dóńgelek ústel, pikirtalas jáne kýrator sabaqtary ótkiziledi. 2,8 mln-nan astam mektep oqýshysyn jáne joǵary oqý oryndary men kolledjderdiń 700 myńnan astam stýdentin qamtý kózdelip otyr. Sonymen qatar is-sharalar onlaın rejımde ótedi.
Basty maqsat – óskeleń urpaqqa Tuńǵysh Prezıdenttiń basshylyǵymen júrgizilgen táýelsiz Qazaqstannyń negizgi reformalarynyń mańyzdylyǵyn jetkizý.
«Táýelsizdiktiń jeti qyry» jobasynyń negizine Táýelsizdiktiń alǵashqy jyldarynda tap bolǵan jeti negizgi syn-tegeýrinder alynǵan. Elbasy 2019 jylǵy 21 maýsymda ótken «Kóshbasshylyqqa 30 jyl» halyqaralyq ǵylymı-praktıkalyq konferentsııasynda sóılegen sózinde olardy atap ótti. Ult pen tutastaı memlekettiń tabysty bolashaǵy olardy eńserýge baılanysty boldy. Bul – naryqtyq ekonomıkanyń qalyptasýy, memlekettik shekaralardy aıqyndaý jáne halyqaralyq ıntegratsııalyq protsester, ultaralyq kelisim, antııadrolyq bastamalar jáne Aral problemasyn sheshý, jańa Astananyń qurylysy, tranzıttik áleýetti iske asyrý, demografııalyq problemalardy eńserý», delingen habarlamada .
Jas Qazaqstannyń basty jeti syn-qateri Tuńǵysh Prezıdent reformalarynyń arqasynda táýelsizdiktiń basty jeti jetistigine aınaldy jáne qazaqstandyq damý jolynyń biregeıligin aıqyndady. Fılmderdiń mazmuny bedeldi spıkerlerdiń – belgili memleket, qoǵam qaıratkerleriniń, tarıhshylardyń, saıasattanýshylardyń, ekonomısterdiń estelikteri men pikirlerine negizdelgen.
Bul fılmderdi «Astana» telearnasynyń ujymy túsirip, elorda kúnine oraı efırde kórsetken edi.
