Bilim mekemelerinde qazaq tilin oqytýǵa erekshe kóńil bólinedi - Almaty qalasy bilim basqarmasynyń bastyǵy R.Shımasheva
ALMATY. 27 sáýir. QazAqparat /Názıra Eleýhan/ - Qalada orta bilim berý uıymdarynyń jelisin damytýǵa basa nazar aýdarylǵan. Bıylǵy jyly qazaq tilinde oqytatyn mektep sany ótken jylmen salystyrǵanda 2 birlikke artyp, ondaǵy oqýshylar sany 987 myńǵa kóbeıdi.
Bul týraly búgin Almatyda ótken qalalyq máslıhatta Almaty qalasy bilim basqarmasynyń bastyǵy Rahat Shımasheva aıtty.
Onyń aıtýynsha, bilim mekemelerinde qazaq tilin oqytýǵa erekshe kóńil bólinedi. «Qazaq tilinde oqytatyn mektepterde qazaq tilin topqa bólip oqytýǵa jergilikti bıýdjetten 2010-2011 oqý jylyna 157 mln. tenge bólindi. Bul memlekettik tildi oqytýdyń sapasyn arttyrýda úlken yqpalyn tıgizýde»,-dep atap ótti ol.
Onyń aıtýynsha, búginde qalada orta bilim beretin 224 mekeme bar, onyń 181-i memlekettik mekeme, 43-i jeke menshik oqý oryndary.
Májilis barysynda Rahat Shımasheva 2015 jyly oqytýdyń 12 jyldyq úlgisine dáıekti kóshý bastalatyndyǵyn málim etti. «12 jyldyq oqý júıesine kóshýge daıyndyq máselesi Almaty qalasynyń bilim júıesindegi erekshe, basym baǵyttardyń biri bolyp tabylady. Bul baǵytta 12 jyldyq oqý júıesine kóshýge tájirıbe jasaý úshin 7 mektep negizinde jumys jalǵasýda. 12 jyldyq oqýǵa baılanysty naqty jospar bekitildi. 2009-2011 oqý jylynda jalpy bilim beretin mekemelerdi 12 jyldyq oqý júıesine kóshirýge baılanysty Almaty qalasy máslıhatynyń sheshimimen júrgiziletin is-sharalar jospary da bekitildi. Bul boıynsha birqatar jumystar atqarylyp jatyr»,-dedi ol.
