Bilim qyzmetkerleriniń kásipodaǵy muǵalimderge myńǵa jýyq noýtbýk syılady

NUR-SULTAN. QazAqparat - Qazaqstandaǵy salalyq bilim jáne ǵylym qyzmetkerleri kásipodaǵy men onyń múshelik uıymdary respýblıkamyzdyń bilim berý uıymdarynda jumys isteıtin ustazdarǵa myńǵa jýyq noýtbýk qurylǵysyn tabystady. Bul týraly QazAqparat Salalyq kásipodaqtyń baspasóz qyzmetine silteme jasap habarlaıdy.

«Qashyqtan bilim berý protsesin tıisti deńgeıde uıymdastyrýǵa úles qosý maqsatynda «Qazaqstandaǵy salalyq bilim jáne ǵylym qyzmetkerleri kásiptik odaǵy» qoǵamdyq birlestigi pedagogtardy qoldaý týraly sheshim qabyldaǵan bolatyn. Osy jumystardyń aıasynda jańa oqý jyly qarsańynda sala qyzmetkerleri – kásipodaq múshelerine jan-jaqty kómek kórsetý sharalary júzege asyryldy. Tek Jambyl oblysynda 336 birlik noýtbýk aımaqtaǵy bilim berý uıymdarynyń balansyna berilse, qalǵan óńirlerde noýtbýk qurylǵylary sala qyzmetkerleri - kásipodaq múshelerine qaıtarymsyz negizde syıǵa tartyldy», - delingen baspasóz baıanynda.

Atap óterlik jaıt, noýtbýkter kópbalaly, az qamtylǵan ustazdarǵa, muqtaj pedagogtarǵa, sonymen qatar otbasynda mektep jasynda jáne stýdent birneshe balasy bar kásipodaq múshelerine berilgen. Budan bólek, birqatar oblystarda ustazdarǵa noýtbýk satyp alýy úshin qarjylaı kómektesti. Al keıbir aımaqtarda kásipodaq ınternet baılanysynyń ótemaqysyn tólep berýdi qolǵa aldy.

Máselen, Qaraǵandy oblysynda Saran aýdandyq kásipodaq komıteti 39 pedagogtyń, Abaı aýdandyq kásipodaq komıteti 50 kásipodaq múshesiniń ınternet tarıfiniń qunyn tóleýge materıaldyq kómek berdi. Qazirgi tańda Salalyq kásipodaq pen onyń múshelik uıymdary Respýblıkalyq «Mektepke jol» aktsııasyna belsendi túrde qatysýda. Pandemııa kezeńinde kásipodaq múshelerin áleýmettik qoldaý jáne quqyqtyq qorǵaý jumystary jalǵasady.