Bilim kúni Qosshyda jańa eki mektep esigin aıqara ashty

QOSShY. QazAqparat – 1 qyrkúıek - Bilim kúni Aqmola oblysynyń Qosshy qalasynda 1500 oryndyq mektep-gımnazııa men 1200 oryndyq orta mekteptiń saltanatty ashylýy ótti, dep habarlaıdy QazAqparat tilshisi.

Aqmola oblysy ákimdiginiń baspasóz qyzmetiniń málimetinshe, jańa mektep-gımnazııa Qosshy qalasynyń jańadan salynyp jatqan shaǵynaýdanynda turǵyzylǵan.

Onda 2,5 myńnan astam oqýshy qazaq jáne orys tilderinde bilim alady.

Bilim oshaǵy «Bolat Ótemuratov qorynyń» jeke ınvestıtsııasy esebinen salynyp, Qosshy qalasynyń bilim bólimine berilip otyr.

«Mektep - meıirim mekeni» alǵashqy qońyraý saltanattyna Oqý-aǵartý mınıstri Ǵanı Beısembaev, Aqmola oblysynyń ákimi Ermek Marjyqpaev, «Vernyı Kapıtal» ınvestıtsııalyq tobynyń bas dırektory Erlan Ospanov, «Bolat Ótemuratov qory» qamqorshylyq keńesiniń tóraǵasy Almaz Sharman, sondaı-aq, ustazdar men oqýshylar jáne olardyń ata-analary qatysty.

Sharada quttyqtaý sóz sóılegen aımaq basshysy pedagogtar men oqýshylardy Bilim kúni jáne oqý jylynyń bastalýymen quttyqtady.

«Aqmola oblysynda, onyń ishinde Qosshy qalasynda úsh aýysymdy oqytý máselesi ózekti boldy. Búgin biz eki jańa mektepti ashý arqyly bul máseleni tolyq sheship otyrmyz», - dep atap ótti oblys basshysy.

Saltanatty jıynda «Vernyı Kapıtal» kompanııalary ınvestıtsııalyq tobynyń bas dırektory Erlan Ospanov ta sóz aldy.

«Bizdiń komanda bul mektepti ozyq tehnologııalardy paıdalana otyryp, zamanaýı talaptarǵa saı turǵyzyp, jabdyqtady. Mektepte balalardyń sapaly damýy úshin barlyq jaǵdaı jasalǵan. Sizderdi 1 qyrkúıek - Bilim kúnimen quttyqtaımyn!»,- dedi Erlan Ospanov.

Sodan keıin bas dırektorǵa mektep ákimshiliginiń kilti saltanatty túrde tabystaldy.

Qazirgi zamanǵy materıaldyq-tehnıkalyq bazasy bar úsh qabatty oqý ornynda 56 oqý jáne 19 arnaıy kabınet ornalasqan.

Sondaı-aq, 2 sport zaly, keń ashana jáne medıtsınalyq kabınet bar.

Sonymen birge, osy kúni 1200 oryndyq taǵy bir jańa orta mektepte alǵashqy qońyraý soǵyldy. Onda oqýshylar memlekettik tilde bilim alady.

Saltanatty shara barysynda bıyl alǵash ret mektep tabaldyryǵyn atap otyrǵan birinshi synyp oqýshysynyń anasy Ardaq Zulqajapqyzy osy ıgi iske qol ushyn sozǵan azamattarǵa shynaıy alǵysyn bildirdi.

«Úsh balamda osy jańa mektepke barady. Buryn oryn bolmaǵandyqtan balalarymyz úsh aýysymdy oqytqan ekinshi mektepte bilim aldy. Endi bul máseleniń túbegeıli sheshilgenine qýanyshtymyn. Jańa mektep óte jaıly, balalarymyzdyń alańsyz bilim alýyna barlyq jaǵdaı jasalǵan», - dep qýanyshymen bólisti Ardaq Zulqajapqyzy.

Aıta ketsek, bıylǵy jyly Aqmola oblysynyń bilim salasyn damytýǵa 220 mıllıard teńge bólindi.

Jańa oqý jylynda 4000 oryndyq 6 jańa mektep ashyldy. Sonymen qatar, jyl sońyna deıin 1800 oryndyq qosymsha taǵy 8 bilim berý mekemesin ashý josparlanǵan.

Eske sala keteıik, budan buryn bıyl Aqmola oblysynda 14,3 myń bala mektep tabaldyryǵyn attaıtynyn jazǵan edik.