Bilim kúni Aqmola oblysynda mınıstrler mektep partasyna otyrdy
Aıta ketý kerek, aǵymdaǵy jyly Aqmola oblysynda 614 mektepke deıingi bilim berý uıymy jumys isteıdi, olarda 38 myńǵa jýyq bala tárbıelenýde. 2019 jyldyń 1 qyrkúıeginen bastap Elbasynyń tapsyrmasy boıynsha balalardy erte damytý baǵdarlamasy engizilýde.
Búgingi tańda 3-6 jastaǵy balalardy mektepke deıingi bilimmen qamtý 99 paıyzdy qurap otyr. Barlyq memlekettik balabaqshalarda aǵymdaǵy jóndeý jumystary júrgizildi.
Oblysta 558 memlekettik mektep jumys isteıdi, oǵan 124 myńnan astam balany qabyldaý josparlanyp otyr. Onyń 16 myńnan astamy – birinshi synypqa baratyn búldirshinder.
Býrabaı aýdanynyń Şýchınsk qalasynda 135 mektepke aldy ınternaty bar, 800 oqýshyǵa arnalǵan №11 jańa ІT-lıtseıi esigin aıqara ashty. Qazirgi zamańǵa saı jabdyqtalǵan bul aýyl balalary úshin resýrstyq ortalyǵy bolatyny sózsiz.
Bilim kúni Aqmola oblysynda elordadan kelgen qonaqtar 8 mektepte alǵashqy qońyraý sharasyna qatysty.
Onyń ishinde, vıtse-premerler Berdibek Saparbaev jáne Jeńis Kasymbek Arshaly aýdanynyń Jibek joly aýylyndaǵy I.Qutpanuly atyndaǵy orta mektep pen Tselınograd aýdanynyń Qoıandy orta mektebinde boldy. Budan bólek, QR Syrtqy ister mınıstri Beıbıt Atamqulov Aqmol aýylyndaǵy №5 orta mektepte, QR Qorǵanys mınıstri Nurlan Ermekbaev Qosshydaǵy №2 orta mektepte, QR Іshki ister mınıstri Erlan Turǵymbaev Qyzyljar orta mektebinde, QR Aqparat jáne qoǵamdyq damý mınıstri Dáýren Abaev Qyzylsýat orta mektebinde, QR Aýyl sharýashylyǵy mınıstri Saparhan Omarov I.Altynsarın atyndaǵy orta mektepte jáne Densaýlyq saqtaý mınıstri Eljan Birtanov Qabanbaı batyr aýylyndaǵy №41 orta mektepte ótken alǵashqy qońyraý sharasyna qatysty.
Sonymen qatar, Aqmola oblystyq basqarmalardyń basshylary bul sharadan tys qalmady. Basqarma basshylary óńirdegi aýdandar men qalalardaǵy 18 mektepte bolyp, ustazdar qaýymy men oqýshylardy jáne olardyń ata – analaryn bilim kúnimen quttyqtady.
«Ustazdaryńnyń arqasynda sender ózderińdi tanyp, keleshek mamandyqty tańdaıtyn bolasyńdar. Ádebıetten bastap, hımııaǵa deıingi pánderdi tereń meńgerip, jan-jaqty tulǵa retinde qalyptasasyńdar. Memleket basshysy Qasym-Jomart Toqaev «Jas urpaq Qazaqstannyń damýynda basty ról atqarady, progresstiń qozǵaýshy kúshi bolady. Biz sizderdiń jetistikter men asqaq armandarǵa jetýlerińiz úshin barlyq jaǵdaı jasaıtyn bolamyz», – dedi vıtse-premer Berdibek Saparbaev Arshaly aýdanynyń Jibek joly aýylyndaǵy I.Qutpanuly atyndaǵy orta mekteptiń oqýshylaryn quttyqtaý sátinde.
Bilim kúni jańa oqý jylynyń ashylýyna baılanysty barlyq mektepterde azamattylyqqa jáne patrıotızmge tárbıeleıtin «Sanaly urpaq – jarqyn bolashaq» taqyrybynda synyp saǵattary ótti.
Jańa oqý jylynyń ashylýyn ótkizýdegi atalmysh format mektep qabyrǵasynda sheneýnikterdiń, ustazdardyń, oqýshylardyń jáne olardyń ata-analarynyń basyn qosýǵa múmkindik beredi jáne keleshekte dástúrge aınalady degen senim bar.
