Bilim kásipodaǵy Arys halqyna 13 mln teńge aýdardy

NUR-SULTAN. QazAqparat - Qazaqstandyq bilim jáne ǵylym qyzmetkerleri kásipodaǵy Arys turǵyndaryna kómek kórsetti, dep habarlaıdy QazAqparat vedomstvonyń baspasóz qyzmetine silteme jasap.

Kásipodaq tóraıymy Maıra Amantaeva Arys qalasyna arnaıy baryp, barlyq óńirdegi aımaqtyq bilim jáne ǵylym salasynyń kásipodaqtary aýdarǵan 13 mln teńgeni arnaıy esep-shotqa aýdardy.

Qaıyrymdylyq is-shara Arys qalasy ákimdiginiń májilis zalynda ótti. Jıynǵa jergilikti atqarý organdarynyń ókilderi, bilim berý oshaqtarynyń basshylary men bastaýysh kásipodaq uıymdarynyń tóraǵalary qatysty.

Jumys sapary barysynda salalyq kásipodaq uıymynyń tóraıymy Maıra Amantaeva jarylys saldarynan zardap shekken birqatar bilim berý uıymdaryna baryp, olardyń jaǵdaıymen tanysty.

Joǵaryda atalǵan qarjylaı kómekpen qatar, atalmysh kásipodaqtyń aımaqtardaǵy uıymdary arystyq balalardy jazǵy lagerlerge ornalastyryp, kıim-keshekpen qamtamasyz etý jumystaryn jalǵastyryp jatyr.

Aıta ketý kerek, 95 jyldyq tarıhy bar Qazaqstandyq bilim jáne ǵylym qyzmetkerleri kásipodaǵy - eldegi eń iri qoǵamdyq uıym. Atalǵan kásipodaq quramynda 700 myńnan astam múshe bar.