Bilim grantynan úmitti kolledj túlekteri UBT-ny qalaı tapsyrady

ASTANA. QazAqparat - Ulttyq testileý ortalyǵy kolledj túlekterine eskertý jasady. 2019 jyldan bastap barlyq kolledj túlegi UBT tapsyrady, qazir KTA degen joq. Kolledj túlegi de UBT-ny jylyna 4 márte tapsyra alady, dep habarlaıdy QazAqparat.

Ol UBT ýaqyty: naýryz, mamyr-maýsym (negizgi UBT dep atalyp, qatysýǵa 2 múmkindik beriledi) jáne tamyz aılary.

Búgin testcenter.kz saıtynda negizgi UBT-nyń birinshi múmkindigine ótinish berý bastaldy.

Ol 6 mamyrǵa deıin jalǵasady.

Al 7 mamyr ekinshi múmkindikke ótinish qabyldana bastaıdy da, 14 mamyr aıaqtalady.

Eger siz kolledjde oqyp bitirgen mamandyǵyńyzdy jalǵastyrmaı, basqa mamandyqqa oqýǵa túskińiz kelse, 5 pán (3 mindetti + 2 beıindik) boıynsha UBT tapsyrasyz.

Ol úshin tirkelý saıtynda «Ótken jylǵy mektep jáne kolledj túlekteri» tetigin basa otyryp UBT-ǵa ótinish beresiz.

- Sizderge test tapsyrmalar sany – 120;

- Jalpy ýaqyty – 4 saǵat (240 mınýt);

- Joǵary ball sany – 140.

Eger siz kolledjdegi mamandyǵyńyzdy jalǵastyryp, grant negizinde JOO-ǵa qysqartylǵan oqytý merzimin kózdeıtin mamandyqtarǵa túskińiz kelse, ótinish berý bóliminde «Qysqartylǵan oqýǵa túsetin kolledj bitirýshileri» sanatyn kórsetesiz.

UBT-ny jalpy kásiptik jáne arnaıy pánder boıynsha tapsyrasyz.

- Testileýdiń test tapsyrmalar sany — 60;

- Jalpy ýaqyty — 2 saǵat (120 mınýt);

- Joǵary ball sany — 70;

- Shekti deńgeı baly — 25, «Pedagogıkalyq ǵylymdar» bilim salasy boıynsha – 35 ball. Onyń ishinde ár pánnen 5 baldan kem bolmaýy tıis.

Eger siz kolledjdi shyǵarmashylyq daıyndyqty talap etetin mamandyq boıynsha bitirip, ary qaraı osy mamandyq boıynsha grant konkýrsyna qatysqyńyz kelse, onda UBT-ny arnaıy pánnen tapsyrasyz. Shyǵarmashylyq emtıhan JOO-da ótedi.

Testileýdiń jalpy ýaqyty — 1 saǵat 20 mınýt (80 mınýt).

Eger siz kolledjdegi mamandyǵyńyz boıynsha aqyly negizde JOO-ǵa qysqartylǵan oqytý merzimin kózdeıtin mamandyqtarǵa túskińiz kelse, UBT tapsyrmaısyz.

Qujattaryńyzdy JOO qabyldaý komıssııasyna ótkizesiz.