Bilim grantyna qatysý úshin 100 myńǵa jýyq ótinish tústi

NUR-SULTAN. QazAqparat - Elimizde bilim berý granttaryn taǵaıyndaý konkýrsyna qatysý úshin qujattardy qabyldaý jalǵasyp jatyr. Bul týraly BǴM silteme jasap QazAqparat habarlaıdy.

Búgingi tańda 100 myńǵa jýyq ótinish berildi. Qujattardy qabyldaý 16 shildede bastalyp, 25 shildege deıin jalǵasatynyn esterińizge sala keteıik. Qujattardy rásimdeý Egov elektrondyq úkimet portaly arqyly onlaın júzege asyrylady. Joǵary oqý oryndarynda vırtýaldy qabyldaý komıssııalary jumys isteıdi. Olar talapkerlerge beıne baılanys arqyly keńes beredi.

Memlekettik bilim berý granttaryn taǵaıyndaý konkýrsyna qatysýǵa qujattardy elektrondy túrde tapsyrý úshin talapkerlerge kelesi qujattar qajet:

1. jeke kýálik;

2. 3h4 kólemindegi elektrondyq tsıfrlyq foto;

3. orta bilim týraly attestattyń kóshirmesi;

4. tehnıkalyq jáne kásiptik bilim berý (TjKB) uıymdarynyń túlekteri úshin dıplomnyń kóshirmesi;

5. TjKB uıymdarynyń túlekteri úshin jumys ótilin rastaıtyn qujattar;

6. jeńildetilgen sanat boıynsha konkýrsqa qatysý úshin rastaıtyn qujattar, atap aıtqanda:

- I, II toptaǵy múgedekter, bala kezinen múgedekter, múgedek balalar qataryndaǵy azamattar;

- jeńildikter men kepildikter boıynsha Uly Otan soǵysy qatysýshylaryna teńestirilgen adamdar;

- aýyldardyń áleýmettik-ekonomıkalyq damýyn aıqyndaıtyn mamandyqtar boıynsha aýyl jastary arasynan shyqqan azamattar;

- Qazaqstan Respýblıkasynyń azamattary bolyp tabylmaıtyn ulty qazaq adamdar;

- jetim balalar jáne ata-anasynyń qamqorlyǵynsyz qalǵan balalar, sondaı-aq kámeletke tolǵanǵa deıin ata-anasynan aıyrylǵan nemese ata-anasynyń qamqorlyǵynsyz qalǵan jastar qataryndaǵy azamattar;

- «Máńgilik el jastary – ındýstrııaǵa!» jobasyna qatysyp jatqan aýyl jastary («Serpin»);

- 4 jáne odan da kóp kámeletke tolmaǵan balalardy tárbıelep otyrǵan otbasylardan shyqqan balalar;

- mártebesi keminde úsh jyl tolyq emes otbasylar qataryndaǵy balalar;

- bala kezinen múgedek balalardy, birinshi jáne ekinshi toptaǵy múgedekterdi tárbıelep otyrǵan otbasylardan shyqqan balalar.

Eger talapker «Altyn belgi» ıegeri bolsa nemese otansúıgishtik jáne belsendi azamattyq ustanymy úshin erekshelik belgisimen marapattalsa, onda ol basqa talapkerlermen baldary teń bolǵan jaǵdaıda basym quqyqqa ıe bolady. Olımpıadalar men sporttyq jarystardyń jeńimpazdary da basym quqyqqa ıe. Ótinish berýshiniń mundaı jetistikteri eskerilýi úshin rastaıtyn qujattardyń kóshirmelerin de júkteý qajet.

Shet tilin meńgergenin rastaıtyn halyqaralyq sertıfıkat bolǵan kezde ótinish berýshi halyqaralyq til sertıfıkatynyń ataýyn, balyn kórsetedi jáne elektrondyq sertıfıkatty tirkeıdi.

Esterińizge sala keteıik, konkýrsqa qatysý úshin qujattardy tapsyrý kezinde medıtsınalyq anyqtama talap etilmeıdi.

Medıtsınalyq anyqtamany tamyz aıynda ýnıversıtetke qabyldaý kezinde tapsyrý qajet. Ótinish berý boıynsha nusqaýlyqpen tómendegi silteme arqyly ótip, tanysa alasyz