Bilim granty ıegerleriniń tizimi 10 tamyzǵa deıin jarııalanady

ASTANA. QazAqparat - Negizgi UBT bastalǵannan beri 218 myńǵa jýyq test tapsyryldy. Onyń ishinde talapkerlerdiń 75%-y qazaq tilinde, 25%-y orys tilinde, 0,1% aǵylshyn tilinde testileýden ótti, dep habarlaıdy QazAqparat.

UBT bastalǵaly shekti baldy 78% - ǵa jýyq talapker jınady. Ortasha balǵa keletin bolsaq, ol 69 baldy qurady. Eń joǵary ball – 137.

«UBT-nyń besinshi aptasy aıaqtaldy. Osy aptada joo qabyldaý komıssııasy óz jumystaryn bastap, 25 tamyzǵa deıin oqýǵa túsýge qujattardy qabyldaıdy. Sondaı-aq, «Pedagogıkalyq ǵylymdar» jáne «Densaýlyq saqtaýǵa» túsýshiler úshin mindetti bolyp tabylatyn emtıhandar bastaldy. Joo-lar 7 shildege deıin shyǵarmashylyq emtıhanǵa qatysý úshin ótinishterdi qabyldap, emtıhandardyń ózin 8-15 shilde aralyǵynda ótkizedi. Grant konkýrsyna qujattardy qabyldaý 13-20 shilde aralyǵynda júzege asyrylady. Memlekettik bilim granty ıegerleriniń tizimi 10 tamyzǵa deıin jarııalanady», - dep atap ótti QR ǴJBM Ulttyq testileý ortalyǵynyń dırektory Rýslan Emelbaev.