Bilim granty beriletin Altynsarın atyndaǵy oqýshylar olımpıadasy bıyl halyqaralyq deńgeıde ótedi
ALMATY. QazAqparat - Ybyraı Altynsarın olımpıadasy tuńǵysh ret halyqaralyq deńgeıde ótkizilmek, dep habarlaıdy QazAqparat tilshisi.
2017 jyldyń 3 naýryzynda Qazaq memlekettik qyzdar pedagogıkalyq ýnıversıtetiniń uıymdastyrýymen elimizdiń mektep bitirýshi oqýshylary arasynda «Y.Altynsarın-2017» respýblıkalyq pándik olımpıadasy ótedi. Mektep túlekterine tegin bilim, ıaǵnı grantty utyp alýǵa múmkindik beretin, sonymen qatar, qabiletti de daryndy oqýshylardy qoldaý maqsatyndaǵy baıqaý bıylǵy jyly osymen altynshy ret uıymdastyrylyp otyr.
«Bul baıqaý ózge baıqaýdan ózgerek bolmaq. Qyzdar ýnıversıtetiniń basshysy Dınar Júsipáliqyzy Nóketaevanyń bastamasymen dástúrli túrde ótkizilip kele jatqan baıqaý bıyl tuńǵysh ret respýblıka boıynsha ǵana emes, halyqaralyq deńgeıde ótkizilmek. Osyǵan oraı bıylǵy baıqaý eki kezeń boıynsha ótedi», - deıdi Qazaq memlekettik qyzdar pedagogıkalyq ýnıversıtetiniń baspasóz hatshysy Názıra Jumaqulova.
Respýblıka boıynsha ótetin olımpıada oblystyq bilim basqarmalarymen, aýdandyq bilim bólimderimen birlese otyryp, Almaty oblysy boıynsha Almaty, Taldyqorǵan, Jarkent qalalary, Kegen aýyldyq okrýgi, Jambyl oblysy boıynsha Taraz qalasy men Qordaı aýdany, Ońtústik Qazaqstan oblysynyń Shymkent, Túrkistan, Jetisaı qalalarynda, Qyzylorda oblysy boıynsha Qyzylorda qalasy, Qazaly, Jańaqorǵan, Qarmaqshy aýdandarynda, Shyǵys Qazaqstan oblysy boıynsha Semeı qalasynda, Qaraǵandy oblysy boıynsha Qaraǵandy qalasynda, Batys Qazaqstan oblysy boıynsha Atyraý, Oral qalalarynda 2017 jyldyń 3 naýryzynda ótkiziledi. Bilim synaǵy respýblıkanyń barlyq aýmaǵynda birdeı ýaqytta saǵat 12.00-de bastalyp 15.30-da aıaqtalady.
Al, halyqaralyq deńgeıde ótetin Y. Altynsarın olımpıadasy 2017 jyldyń 17 naýryzynda 5 memlekette ótkiziledi: Ózbekstan, Qyrǵyzstan, Mońǵolııa, Qytaı jáne Reseı elderinde. Qazirgi ýaqytta olımpıadaǵa qatysýǵa tilik bildirýshi oqýshylardy tirkeý jalǵasýda. Aıta keteıik, nıet bildirýshiler QazMemQyzPÝ resmı saıtynda bekitilgen forma boıynsha onlaın rejımde tirkele alady jáne olımpıada týraly tolyq maǵlumatpen Qyzdar ýnıversıtetiniń saıtynan tanysa alady (www.kazmkpu.kz).
«Jeńimpazdar men júldegerler sáýir aıynda anyqtalyp, marapattalady. Olımpıadadan joǵary nátıjege qol jetkizgen qyz balalarǵa Qazaq memlekettik qyzdar pedagogıkalyq ýnıversıtetine túsýge jol ashylady. Olımpıadanyń ár páninen 1, 2, 3 oryndy ıelengen oqýshy tańdaǵan páni mamandyǵyna saı kelgen jáne testileýge qajetti ótý balyn alǵan jaǵdaıda oqý aqysyna 90% jeńildik beretin dıplommen marapattalady. Júldeli oryn almaǵanymen, olımpıadanyń joǵary deńgeıinen ótkender QazMemQyzPÝ-dyń oqý tólemaqysyna 10% jeńildikke quqyq beretin sertıfıkattarmen marapattalady. Ol oqý ornyna birinshi kezekte qabyldanýǵa quqyq beredi», - dedi Qazaq memlekettik qyzdar pedagogıkalyq ýnıversıtetiniń baspasóz hatshysy Názıpa Jumaqulova.
Eske sala keteıik, byltyrǵy ótken «Y.Altynsarın-2016» olımpıadasyna 3500-den asa mektep bitirýshi oqýshylar qatysqan bolatyn Onyń 24-i rektor grantyna ıe bolsa, 10 paıyzdyq jeńildikke 548 oqýshy ilikti.
