Bilim granttaryn jaǵdaıy tómen otbasylarǵa ǵana berý kerek - Qanat Nurov
Onyń aıtýynsha, búginde bilim salasyndaǵy memlekettik tapsyrystyń kólemi eki esege artsa da, kedeı otbasylardan shyqqan balalardyń jartysynan kóbi grant sııaqty qarjylaı qoldaýdy kórip otyrǵan joq. "Sebebi úlken bir problema bar. Qalamen salystyrǵanda aýylda ulttyq biryńǵaı testileýdiń kórsetkishi áldeqaıda tómen bolyp turady. Al aýyldyq kvota 30 paıyzben berilse de, oǵan iligetin jastar neken-saıaq. Óıtkeni testti tapsyra almaı jatqandar kóp. Endi, bul máseleni qalaı sheshý kerek? Menińshe, bilim granttaryn áleýmettik jaǵynan az qamtylǵan, biraq daryndy balalarǵa berý kerek. Ondaı múmkindikti múgedekterge de bergen durys. Ony taza áleýmettik shara dep qabyldamaý qajet. Atalǵan bastama ekonomıkalyq jaǵynan da tıimdi. Sebebi aýyl jastarynda úlken stımýl bar. Olardyń qoǵamda óz ornyn tabýǵa degen yntasy zor", - dedi Q.Nurov QR Parlamenti Májilisinde ótken dóńgelek ústelde.
Qazaq ulttyq agrarlyq ýnıversıtetiniń birinshi prorektory Qanat Tireýov te aýyl jastarynyń grantqa ilige almaı júrgenin jetkizdi. Onyń sózine qaraǵanda, bilim granttaryn taratýdyń qazirgi júıesi aýyl jastaryna elimizdiń úzdik ýnıversıtetterinde oqýǵa múmkindik bermeı otyr. Sebebi qala men aýyldyń orta bilim deńgeıi ártúrli, mektep oqýshylaryn daıarlaý jaǵynan áli de alshaqtyq bar. "Máselen, 2018 jyly Ulttyq biryńǵaı testileý kezinde aýyl mektepterin bitirgen túlekterdiń 57 paıyzy - 26 000 myńnan astam adam eń tómengi upaıdy jınaı almady. Sóıtip, konkýrstan óte almady. Al QR Bilim jáne ǵylym mınıstrliginiń málimetine sáıkes, búginde kedeı otbasylardan shyqqan stýdentterdiń jartysynan kóbi eshbir qarjylaı qoldaýsyz oqyp jatyr", - dep atap kórsetti Q.Tireýov.
Aıta keteıik, búgingi jıynda negizgi baıandamany QR Bilim jáne ǵylym vıtse-mınıstri Talǵat Eshenqulov jasady. Onyń aıtýynsha, bıyl grant taratý júıesinde birqatar ózgerister bolady. Budan bólek, mektep túlekterine mamandyqty tańdaý jaǵy jeńildeı túsedi. Vıtse-mınıstr qosymsha granttardyń qalaı taratylǵanyn da aıtyp berdi. Al "Serpin" baǵdarlamasynyń granttary ıgerilmeı jatyr.
