Bilim granttaryn taratýda jemqorlyq ýshyǵyp keledi - Shpekbaev
ASTANA. QazAqparat - QR Memleketti qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaevtyń aıtýynsha, memlekettik granttardy bólý quzyreti ýnıversıtetterdiń ózderine berilgennen keıin jemqorlyq máselesi ýshyǵyp ketti, dep xabarlaıdy QazAqparat tilshisi.
«Sońǵy jyldary memlekettik granttardy taratý kezinde qyzmet babyn asyra paıdalaný máselesi ýshyǵyp keledi. Sebebi qazirgi kezde granttardy ýnıversıtetterdiń ózderi taratady. Al grantardy bólý týraly sheshimder, kóp jaǵdaıda, postfaktým, ıaǵnı bári sheshilgennen keıin ǵana jarııalanady. Sol sebepti granttardy taratý jumysyna qoǵamdyq baqylaýdy ornatý qajet. Negizi, osy saladaǵy jemqorlyqqa, kóbinese, oqytýshylardyń tómen jalaqysy sebep bolyp jatady», - dedi Shpekbaev sybaılas jemqorlyqqa qarsy jol kartasyn iske asyrýǵa arnalǵan selektorlyq keńeste. Búginde atalǵan kartany agenttik «Nur Otan» partııasymen birge iske asyryp keledi.
Esep komıtetiniń málimetine sáıkes, ótken jyly joǵary oqý oryndarynda 109 qarjylyq tártip buzýshylyqtar boldy. Shyǵynnyń jalpy kólemi 14,3 mlrd teńgeni qurady. Tártip buzýshylyqtardyń ishinde túlekterdiń jumysqa turǵany týraly jalǵan esep berý, qarjylyq shyǵyndardy oıdan qurastyrý jáne taǵy basqa áreketter bar.
Jyl basynan beri bilim salasynda 138 jemqorlyq áreketi anyqtaldy. Atalǵan kórsetkish ótken jyldyń alty aıymen salystyrǵanda, 4 paıyzǵa artyq.
