Bilim granttaryn taǵaıyndaý jónindegi respýblıkalyq konkýrsqa 74 myń túlek qatysady
ASTANA. 12 maýsym. QazAqparat - 2012 jyly bilim granttaryn taǵaıyndaý jónindegi respýblıkalyq konkýrsqa Ulttyq biryńǵaı test synaǵyn tapsyrǵan 74 myń mektep túlegi qatysady,
dep habarlady Ulttyq testileý ortalyǵynyń dırektory Qalı Ábdıev rm.kz saıtyna bergen suhbatynda.
Q.Ábdıevtiń aıtýynsha, konkýrsqa UBT synaǵyn tapsyrǵan barlyq oqýshylardyń 64 paıyzy qatysqaly otyr.
Ulttyq biryńǵaı test synaǵynyń 154 arnaıy pýnktte ótip jatqanyn atap kórsetken ol, qazirgi ýaqytta barlyq túlektiń 78 paıyzy nemese 117 431 oqýshy emtıhan tapsyryp bolǵanyn aıtty.
Ortalyq dırektorynyń pikirinshe, aǵymdaǵy jyly UBT ótkizý kezinde obektıvtilikti jaqsartýǵa qol jetkizilip otyr.
«Jalpy alǵanda, bıyl UBT obektıvtiligin jaqsartý máselesinde oń nátıjege qol jetkizdik dep oılaımyn. Túlekterdiń barlyǵy laıyqty baǵalaryn aldy. Ol úshin birqatar shara qabyldandy. Mysaly, aýdıtorııalarda, ásirese aýyldyq jerlerde, Bilim jáne ǵylym mınıstrliginiń ókilderi emtıhan qabyldady. Test synaǵyn uıymdastyrýǵa alǵash ret bilim jáne ǵylym salasyndaǵy óńirlik baqylaý departamentteriniń qyzmetkerleri atsalysty. Bul - bilim berý sapasyna baqylaý júrgizetin jańa qurylym»,- dep atap kórsetti Qalı Ábdıev.
Esterińizge sala keteıik, Ulttyq biryńǵaı testileý 1-15 maýsym aralyǵynda arnaıy jabdyqtalǵan 154 pýnktte ótýde. 107 pýnkt aýdan ortalyqtary men qalalardaǵy mektep ǵımarattarynda ornalastyrylyp, al qalǵan 47-si oblys ortalyqtary men Astana jáne Almatydaǵy joǵary oqý oryndarynyń ǵımarattarynda jabdyqtalǵan.
