Bilim berýdi ekonomıkalyq ósý modeliniń ortalyq býynyna aınaldyrý mindeti qoıylyp otyr - Espolov
ALMATY. QazAqparat - Elbasy Joldaýy qazirgi zaman talabyna sáıkes elimizdiń jahandyq básekege qabilettiligin shyńdaıtyn qujat, dedi Qazaq Ulttyq Agrarlyq ýnıversıtetiniń rektory Tilektes Espolov «Agroónerkásiptik keshen Qazaqstan ekonomıkasy damýynyń draıveri» atty respýblıkalyq forýmda, dep habarlaıdy QazAqparat tilshisi.
«Bul qujatta (Joldaýda - red.) Qazaqstannyń Úshinshi jańǵyrýyna saı atqarylatyn sharalar kesheni tolyqtaı qamtylǵan. Elbasynyń strategııalyq josparlarynyń tabysty júzege asyrylýynyń nátıjesinde, Qazaqstandy jańǵyrtýdyń eki qadamyn artqa tastap, Úshinshi jańǵyrýǵa qadam bastyq. Bul jańǵyrý - bes basymdyqqa negizdelgen», - dedi rektor.
Sonymen qatar, ǵalym baıandamasynda el damýynyń strategııasyn durys tańdap, ony ári qaraı júzege asyrý birinshi kezekte adam kapıtalyna baılanysty ekenin tilge tıek etti.
«Sondyqtan, búkil álemdik júıedegi bolashaq orny men róli adam kapıtalynyń sapasyna qatysty bolǵandyqtan Memleket basshysy bul máselege tereń mán berip otyr. Men atalǵan basymdyqtardyń ishindegi adamı kapıtal sapasyn jaqsartýǵa baǵyttalǵan tórtinshi basymdyqqa toqtalyp keteıin. Kez-kelgen eldegi bilim berý júıesi ulttyq mádenıettiń jáne tanymnyń kórsetkishi retinde ekonomıka, saıasat, mádenıet salasyndaǵy ózgeristerge de áser etedi. Bilim búkil álemde tulǵany áleýmettik-ekonomıkalyq úderiske tıimdi qatysýyn qamtamasyz etetin negizgi faktor. Sondyqtan, Elbasy tórtinshi basymdyqta bilim berý júıesiniń atqaratyn rólin ózgertýge asa mán berdi. Demek, bilim berýdi ekonomıkalyq ósýdiń jańa modeliniń ortalyq býynyna aınaldyrý mindetin qoıyp otyr», - dedi Tilektes Espolov.
Eske sala keteıik, 2017 jyldyń 31 qańtarynda Qazaqstan Respýblıkasynyń Prezıdenti Elbasy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýyn jarııa etti.
