Bilim berýdi damytýdyń 2005-2010 jyldarǵa arnalǵan memlekettik baǵdarlamasy tolyq kólemde iske asqan joq - D. Nóketaeva
ASTANA. Naýryzdyń 29-y. QazAqparat /Qanat Mámetqazyuly/ - Qazaqstan Respýblıkasynda bilim berýdi damytýdyń 2005-2010 jyldarǵa arnalǵan memlekettik baǵdarlamasy tolyq kólemde iske asqan joq.
Búgin QR Parlamenti Májilisinde «Qazaqstan Respýblıkasynda bilim berýdi damytýdyń jaı-kúıi men bolashaǵy» taqyrybynda ótken Úkimet saǵatynda Áleýmettik mádenı damý komıtetiniń tóraıymy Dınar Nóketaeva osylaı málimdedi, dep habarlaıdy QazAqparat.
Depýtattyń aıtýynsha, 2005-2010 jyldarǵa arnalǵan baǵdarlamanyń tolyq kólemde iske aspaý sebebinen 12 jyldyq bilim berýge kóshý keıinge shegerilgen. Onyń sózine qaraǵanda, jalpy baǵdarlama boıynsha bilim salasyndaǵy oń ózgeristerge jeteleıtin reformalar aıaǵyna deıin júrgizilmeı qaldy.
«Sońǵy kezderi álemde bazalyq bilim berýdiń sapasyna basa kóńil aýdarý beleń alýda, ıaǵnı bul halyqtyń ómir súrý deńgeıin jaqsartýdyń basty sharty retinde tanylyp otyr. Osy oraıda mektepke deıingi jelilerdi damytý asa mańyzdy bolyp tabylady. Qazaqstanda bes-alty jastaǵy balalardy mektepke deıingi daıyndyqtan ótkizýdi birtindep júzege asyrý josparlanyp otyr. Árıne, bul ońaı sharýa emes, óıtkeni búgingi kórsetkish óte tómen. Elbasynyń tapsyrýymen «Balapan» baǵdarlamasy iske asyrylmaqshy. Bul rette memlekettik balabaqshalarmen birge jekemenshik balabaqshalardy da kóptep ashý kózdelip otyr. Degenmen, ata-analardyń basym bóligi balalaryn jeke menshik balabaqshaǵa berýge shamasy joq. Sondyqtan memlekettik balabaqshalardy kóptep ashýdy qolǵa alǵan jón dep esepteımiz», dedi D. Nóketaeva. Sonymen qatar, depýtat 12 jyldyq bilim berýge kóshýdi shegerýge qatysty jaǵdaılardy muqııat tekserý qajettigin alǵa tartady.
«Múmkin, qazirden bastap 9-shy synyptan keıin, balalardyń qabiletine baılanysty gýmanıtarlyq, jaratylystaný-matematıkalyq oqýlarǵa beıimdep gımnazııa, lıtseılerge oqytýdy, al tehnıkalyq kásiptik bilim alýǵa beıimderin beıindik bilim berýdi bastaǵan jón bolar. Bul úshin mektepterdiń materıaldyq-tehnıkalyq bazasyn nyǵaıtý arqyly mektep janynan oqý-óndiristik ortalyqtar ashsa. Sonda balalar 11-shi synypty bitirgende belgili bir mamandyq ıesi bolar edi. ıAǵnı 12 jyldyq oqytýǵa kóshýdi joǵarǵy synyptardan bastaǵan jón bolatyn sııaqty. Bul 12 jyldyq jalpy orta bilim berýge kóshýdiń ótpeli kezeńiniń bazasyn qurap, atalǵan baǵdarlamany tezirek júzege asyrýǵa septigin tıgizer dep oılaımyn», dedi Komıtet tóraıymy.
