Bilim berý júıesinde joǵary oqý oryndarynyń jańa jikteýishi engiziledi - Bilim jáne ǵylym mınıstri
TANA. 6 qyrkúıek. QazAqparat /Aıdar Ospanalıev/ - Bilim jáne ǵylym mınıstri Baqytjan Jumaǵulovtyń aıtýynsha, bolashaqta joǵary bilim berý júıesinde joǵary oqý oryndarynyń jańa jikteýishi engiziledi. Sondaı-aq jańa ınstıtýtsıonaldy element zertteý ýnıversıteti degen uǵym engiziledi.
Bul bilim berý jáne zertteý protsesin biriktirý tendentsııasyn iske asyrýǵa jáne bilim men ǵylym arasyndaǵy alshaqtyqty joıýǵa múmkindik beredi. Bul týraly mınıstr búgin Astanada ótip jatqan «Táýelsizdikke 20 jyl: Qazaqstan Respýblıkasyndaǵy adam kapıtalyn damytýdyń sapasy men bolashaǵy» atty halyqaralyq konferentsııa barysynda málim etti.
Mınıstrdiń sózine qaraǵanda, atalmysh máseleler Qazaqstan Respýblıkasynda bilim berýdi damytýdyń 2011-2020 jyldarǵa arnalǵan memlekettik baǵdarlamasynda kórsetilgen. «Álemdik tájirıbege saı jańa jikteýishtiń árbir deńgeıi boıynsha jańa talaptar ázirledik. Bul talaptar qazaqstandyq joǵary oqý oryndaryn ınstıtýtsıonaldy túrde retteýge múmkindik beredi. Sonymen qatar, kadrlar daıarlaýdyń sapasyn arttyrady»,- deıdi mınıstr.
B.Jumaǵulovtyń sózine qaraǵanda, osy júıede halyqaralyq jáne respýblıkalyq deńgeıde akademııalyq mobıldilikti damytýǵa erekshe kóńil bólinýde. «Al akademııalyq mobıldilik - Bolon protsesiniń mańyzdy prıntsıpteriniń biri. Qazaqstanda alǵash ret akademııalyq mobıldikti memlekettik qoldaý tetigi engizildi. Endi ulttyq ýnıversıtet stýdentteri memleket esebinen semestr boıy úzdik eýropalyq joǵary oqý oryndarynda, al aımaqtyq joǵary oqý oryndarynyń stýdentteri ulttyq ýnıversıtetterde oqı alady»,-deıdi vedomstvo basshysy.
