Bilim berý júıesinde Baqylaý keńesteri arqyly korporatıvtik basqarý júıesiniń ilki jobasy engizilip jatyr - Bilim jáne ǵylym vıtse-mınıstri
ALMATY. 27 qańtar. QazAqparat /Erlik Erjanuly/ - Blim berý júıesinde korporatıvtik basqarýdaǵy úzdik jasalymdardy engizýge baǵyttalǵan Baqylaý keńesi 4 ulttyq ýnıversıtette quryldy.
Bilim jáne ǵylym vıtse-mınıstri Saıat Shaıahmetov búgin Qazaq ulttyq ýnıversıtetinde ótken Baqylaý keńesiniń alǵashqy otyrysynda osylaı aıtty.
"QR Premer-Mınıstri Kárim Másimov basqaratyn Baqylaý keńesi Nazarbaev Ýnıversıtetinde jumys jasaıdy. Barlyq májilis QR Prezıdentiniń qatysýymen ótedi. Damýǵa qatysty máselelerdiń bári osynda sheshiledi. Bul ýnıversıtetterdi basqarý júıesin oń baǵytqa qaraı ózgertýge múmkindik beredi", - deıdi S.Shaıahmetov. Saıat Bolatulynyń aıtýynsha, Elbasynyń Qazaqstan halqyna Joldaýynda da bul másele kórinis taýyp otyr. Onda aıtylǵan basym baǵyttardyń bári kadrǵa baılanysty. Aýyl sharýashylyǵy salasyna mamandar daıyndaýda jetekshi oqý orny sanalatyn Qazaq ulttyq agrarlyq ýnıversıtetiniń bul saladaǵy róli óte zor. Ózine júktelgen jaýapkershilik júgin ýnıversıtet tolyq kótere alatynyna senim mol.
Baqylaý keńesi - halyqaralyq tájirıbe boıynsha ázirlengen, bilim jáne densaýlyq saqtaý salasyndaǵy memlekettik kásiporyndardy korporatıvti basqarýdyń jańa úlgisi bolyp sanalady. Ol Almatydaǵy ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti pen Qazaq ulttyq agrarlyq ýnıversıtetinde jáne Astanadaǵy L.N. Gýmılev atyndaǵy Eýrazııa ulttyq ýnıversıtetinde qurylǵan. Erteń endi ál-Farabı atyndaǵy Qazaq ulttyq ýnıversıtetiniń Baqylaý keńesiniń alǵashqy otyrysy ótpek.
