Bilim berý jınaqtaý júıesinde 19 myńnan astam salymshy tirkeldi
ASTANA. QazAqparat - Qazaqstanda memlekettik bilim berý jınaqtaýshy júıesinde 17 mlrd teńgege jýyq qarjy tirkeldi. Bul týraly Bilim jáne ǵylym mınıstrliginiń baspasóz qyzmeti málim etti, dep habarlaıdy QazAqparat.
Memlekettik bilim berý jınaqtaý júıesi - bul Qazaqstan Respýblıkasynyń kez kelgen azamaty úshin bolashaqta Qazaqstanda jáne shetelde kásibı-tehnıkalyq, joǵary bilim aqysyn tóleýge bolatyn, óziniń nemese balasynyń atyna bilim berý jınaqtaý salymyn ashý.
Atalǵan jınaqtaý júıesi Qazaqstannyń árbir azamatyna balalaryn qazaqstandyq nemese sheteldik joǵary oqý oryndarynda oqytý úshin jınaqtaýshy depozıt ashý múmkindigin beredi. Bul depozıtke 14 paıyzǵa deıin banktiń paıyzdary túsip turady. Sondaı-aq, salymshylar memlekettiń 7 paıyzdyq (turǵyndardyń osal toby) nemese 5 paıyzdyq (basqa da turǵyndar) memlekettik ústemaqysyn alý múmkindigine ıe.
«Búgingi kúni 16,8 mlrd teńge somasyna 19 myńnan astam salymshylar tirkelgen. Atap aıtsaq, 2015 jyldyń aqpan aıynda 4,7 mln teńge kóleminde memlekettiń alǵashqy ústemaqysy tólengen, al 2016 jyly bul soma 325,6 mln teńge bolsa, 2017 jyly 458 mln teńgeni qurady»,- delingen mınıstrlik málimetinde.
AQSh, Ulybrıtanııa, Kanada, Sıngapýr, Malaızııada da tómendetilgen salyq tarıfteriniń, memlekettik ústemaqylar jáne paıyzdyq mólshemeler esebinen qarjy jınaqtaý depozıttik júıesi jumys isteıdi. Bul elderde jınaqtaý boıynsha ata-analarǵa balanyń atyna 18 jasqa tolǵansha jylyna 2000 AQSh dollary mólsherine deıin salym salyp turýǵa ruqsat etiledi. Bul qarajatty kásibı bilim alý úshin salyq tólemeı sheship alýǵa bolady. Osylaısha, Qazaqstandaǵy bilim berý depozıtteri basqa memleketterdegideı balalardyń bolashaqtaǵy bilimi úshin aqsha jınaqtaýǵa kóp kómegin tıgizedi.
