Bilim berý uıymdarynda dabyl túımelerin ornatý 92 paıyzǵa aıaqtaldy
«Bilim berý uıymdarynyń qaýipsizdik quraldarymen qamtylýy máselesine toqtalsaq, elimizdiń bilim berý uıymdary 100% beınebaqylaý júıesimen qamtamasyz etilgen. Bul rette, ákimdikter beınebaqylaý júıelerin nusqaýlyqtyń jańa talaptaryna sáıkestendirý boıynsha jumysty jalǵastyryp keledi. Bilim berý uıymdarynyń beınebaqylaý júıelerin jedel basqarý ortalyqtaryna nemese ishki ister organdarynyń kezekshi bólimderine qosý deńgeıi 83%-ǵa nemese 5,5 myńnan asa bilim berý uıymynda (1 259 balabaqsha, 4 084 mektep, 245 kolledj) qamtamasyz etilgen», - dedi E. Ospan Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.
Onyń aıtýynsha, lıtsenzııalanǵan kúzetpen qamtamasyz etý 75%, ıaǵnı nusqaýlyq talaptaryna sáıkes iri qalalarda lıtsenzııalanǵan kúzetpen 1 900-den astam bilim uıymy shart bekitken.
«Al, kúzet fırmalaryna qosylǵan dabyl túımelerin ornatý bilim berý uıymdarynyń 92 paıyzynda aıaqtaldy. Óńir ákimdikterine jańa oqý jylynyń bastalýyna deıin qaýipsizdik júıelerimen qamtamasyz etý jónindegi jumysty aıaqtaý tapsyryldy. Osy maqsatta jergilikti atqarýshy organdar bilim berý uıymdarynyń qaýipsizdigin qamtamasyz etýge qarajat bóldi. Bul jumystar mınıstrliktiń baqylaýynda», - dedi vıtse-mınıstr.
Onyń sózine qaraǵanda, qazirgi kezde jergilikti bıýdjette bilim berý uıymdaryn qaýipsizdik júıelerimen odan ári qamtamasyz etýge 12 mlrd 777 mln teńge somasynda qarajat qarastyrylǵan
Budan buryn habarlanǵandaı, 2020 jylmen salystyrǵanda jedel basqarý ortalyqtaryna qosylǵan bilim berý uıymdarynyń sany 11 esege (2020 j. – 500, 2023 j. – 5 588) artty.
Oqýshylary kóp jáne iri qalalarda ornalasqan bilim berý uıymdarynda lıtsenzııalanǵan kúzettiń qamtamasyz etilmeýi anyqtaldy.
