Bilim berý uıymdary beınebaqylaý júıesimen 100 paıyz qamtylǵan
«2023 jylǵy 1 naýryzdaǵy jaǵdaı boıynsha beınebaqylaý júıelerimen bilim mekemeleri 100 paıyz qamtylǵan. Ákimdikter olardy nusqaýlyqtyń jańa talaptaryna sáıkestendirý jumystaryn júrgizýde. Al jedel basqarý ortalyqtaryna 6 myńǵa jýyq bilim oshaqtary qosylǵan. Lıtsenzııalanǵan kúzetpen 2 myńǵa jýyq, dabyl túımelerimen 2400-den asa bilim berý nysandary qamtylǵan», - dedi mınıstr.
Degenmen, ol bul jumysty Memleket basshysynyń tapsyrmasyna sáıkes, birqatar óńirler 2023 jyldyń qyrkúıegine deıin tolyq aıaqtaýy qajet ekendigin basa aıtty.
«Bilim berý uıymdarynyń qaýipsizdigine tolyq tekserý júrgizý máselesi aqpan aıynda óńir ákimderi orynbasarlarynyń qatysýymen mınıstrlik ótkizgen arnaıy keńeste qaraldy. Osyǵan oraı birneshe memlekettik mekemeler men qoǵamdyq uıym ókilderinen quralǵan 162 monıtorıngtik top 20 óńirde jumys isteýde. Búgingi kúni monıtorıngtik top 10 myńnan asa bilim berý uıymdarynyń 7 myńǵa jýyǵyn qamtydy. Jumys naýryz aıynyń sońyna deıin aıaqtalyp, nátıjesi mınıstrliktiń alqaly otyrysynda qaralatyn bolady», - dedi Ǵanı Beısembaev.
