Bilim berý úrdisin tárbıelik maqsatta paıdalaný qajet - M.Sarybekov
ASTANA. 27 tamyz. QazAqparat - Oqytý úrdisiniń tárbıelik áleýetin kúsheıtý jónindegi tıptik keshendi jospardy júzege asyrý sheńberinde oqý pánderi tárbıelik maqsatta da paıdalanylatyn bolady,
dep habarlady QR Bilim jáne ǵylym vıtse-mınıstri Mahmetqalı Sarybekov Pm.kz saıtyna bergen suhbatynda.
«Tıptik keshendi jospar oqý pánderiniń tárbıelik múmkindikterin paıdalanýǵa tıis bolǵandyqtan da qabyldandy. Buǵan deıin tárbıe jumysy synyptan tys jáne mektepten tys sharalar arqyly júrgizilip keldi. Biz oqý pánin úırený barysynda oqytý úrdisin tárbıelik maqsatta tolyǵymen paıdalanǵan emespiz», - dedi M.Sarybekov.
Atalǵan jospar oqý úrdisin tárbıeleý elementimen qamtamasyz etýdiń birden úsh maqsatyn sheshýge múmkindik beredi. "Birinshiden, ol tárbıe jumysyna júıeli ári keshendi sıpat beredi, ekinshiden, ol tárbıe sharalarynyń úziktigi men epızodtyǵyn boldyrmaıdy, úshinshiden, oqýshylar men stýdent jastardy neǵurlym kóbirek tartýǵa kómektesedi", - dep basa aıtty vıtse-mınıstr.
Oqytý úrdisiniń tárbıelik áleýetin kúsheıtý jónindegi tıptik keshendi josparmen qatar, Mınıstrlik Oqýshylardyń fýnktsıonaldyq saýattylyǵyn damytý jónindegi ulttyq is-áreket josparyn da ázirledi. Atalǵan qujat bilimdi naqty jaǵdaılarda qoldaný daǵdylaryn qalyptastyrýǵa baǵyttalǵan.
Esterińizge sala keteıik, Oqytý úrdisiniń tárbıelik áleýetin kúsheıtý jónindegi tıptik keshendi jospar men Oqýshylardyń fýnktsıonaldyq saýattylyǵyn damytý jónindegi ulttyq is-áreket jospary Memleket basshysynyń Qazaqstan halqyna arnaǵan «Áleýmettik-ekonomıkalyq jańǵyrtý - Qazaqstan damýynyń basty baǵyty» Joldaýynda berilgen tapsyrmalar boıynsha ázirlengen.
