Bilim berý sapasyn arttyrý máselesi ulttyq deńgeıde qaralatyn bolady - B.Jumaǵulov
ASTANA. 11 qazan. QazAqparat - Búgin QR Bilim jáne ǵylym mınıstri Baqytjan Jumaǵulovtyń tóraǵalyǵymen otandyq bilim berý sapasyn arttyrý máselelerine arnalǵan jumys keńesiniń májilisi ótti.
Oǵan mınıstrlikke qarasty barlyq aımaqtyq qurylymdardyń basshylary qatysty.
Mınıstr atap kórsetkendeı, búgingi kúnniń negizgi máselesi - bilim sapasyn kóterý. Osyǵan oraı búgingi jıynǵa mınıstrliktiń jańadan ashylǵan oblystyq qurylymdary - kásiptik biliktilikti arttyrýdyń «Órleý» ulttyq ortalyǵynyń bólimsheleri, jastar saıasaty basqarmalary, bilim berý salasyndaǵy baqylaý jáne balalar quqyqtaryn qorǵaý departamentteriniń jetekshileri jınalyp, otandyq bilim berý sapasyn kóterýdiń negizgi tetikterin talqyǵa saldy. Qazirgi kezde atalǵan qurylymdarda jumys isteıtin mamandardyń sany 2,5 myńnan asyp jyǵylady. B.Jumaǵulov olardyń jergilikti jerlerdegi kásibı jumysyna úlken senim artyp otyr.
«Búgin biz jumys keńesin ótkizip otyrmyz. Ol respýblıkalyq dárejede ótip jatyr deýge bolady. Bul - mınıstrliktiń ulttyq deńgeıdegi jańa qurylymy. Endi, bilim berý sapasyn arttyrý máseleleri osynda, ulttyq deńgeıde qaralatyn bolady», - deıdi B.Jumaǵulov.
