Bilim berý salasynda jemqorlyq faktileri tómendegen- agenttik
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttigi eldegi sybaılas jemqorlyq qylmystarynyń tómendegenin málimdedi, dep habarlaıdy QazAqparat tilshisi.
«Qazaqstanda 2 jyl qatarynan sybaılas jemqorlyq kórinisteriniń turaqty tómendeý úrdisiniń saqtalýyn atap aıtý kerek. Bul keshendi jáne júıeli aldyn alý sharalarynyń, sondaı-aq azamattyq qoǵam men bıznestiń sybaılas jemqorlyqqa qarsy qyzmetke tartylýynyń eleýli ósýiniń nátıjesi. 2017 jyly 2016 jylmen salystyrǵanda sybaılas jemqorlyq quqyq buzýshylyqtar 17,7 paıyzǵa az tirkelgen. Aǵymdaǵy jyldyń 11 aıynda sybaılas jemqorlyq qylmystar sany ótken jyldyń sáıkes kezeńimen salystyrǵanda 7 paıyzǵa tómendedi», - dedi atalǵan agenttiktiń resmı ókili Janna Bastarova.
Onyń sózine qaraǵanda, birqatar óńirlerde sybaılas jemqorlyq qylmystarynyń aıtarlyqtaı tómendeýi baıqalady. Basqa oblystarmen salystyrǵanda, sybaılas jemqorlyqtyń joǵary emes deńgeıi Soltústik Qazaqstan, Pavlodar jáne Aqtóbe oblystarynda tirkeldi. Sonymen birge, Jambyl oblysynda onyń 45 paıyzdan astam, Qaraǵandy oblysynda 30 astam deńgeıge edáýir tómendeýi baıqaldy.
«Sybaılas jemqorlyq deńgeıiniń tómendeýi boıynsha oń úrdis birqatar ortalyq memlekettik organdarda oryn aldy. Munda jaǵdaıdy jaqsartý boıynsha Investıtsııalar jáne damý, Ulttyq ekonomıka mınıstrlikteri kósh bastap tur. Munymen qosa, quqyq buzýshylyqtar sanynyń aıtarlyqtaı tómendeýi bilim jáne áleýmettik qamtamasyz etý salalarynda baıqaldy», - dedi Janna Bastarova.
