Bilim berý pánderi boıynsha respýblıkalyq olımpıadada 183 oqýshy altyn medal aldy
Al 274 oqýshy kúmis jáne 462 oqýshy qola medal aldy. Osylaısha elimizdiń túkpir-túkpirinen kelgen barlyǵy 919 oqýshy júldeli oryndarǵa ıe boldy, dep habarlaıdy QazAqparat QR bilim jáne ǵylym mınıstrliginiń baspasóz qyzmetine silteme jasap.
«Qorytyndy kezeń olımpıadanyń barlyq aldyńǵy kezeńi sııaqty Oqylyq.kz platformasynda elektrondy formatta ótti. Ashyqtyq pen akademııalyq adaldyqty saqtaý úshin olımpıada beınebaqylaý júıesimen qamtamasyz etildi, sondaı-aq táýelsiz baqylaýshylar protsesti baqylap otyrdy. Endi respýblıkalyq jarystyń jeńimpazdary irikteýden keıin olımpıadalyq rezervke túsip, olarǵa oqý-jattyǵý jıyndary uıymdastyrylady. Nátıjesinde Qazaqstannyń namysyn IMO sııaqty aýqymdy halyqaralyq olımpıadalarda qorǵaıtyn ulttyq qurama jasaqtalady», - dep aıtty QR BǴM «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov.
Aıta keteıik, bıyl medaldar sany byltyrmen salystyrǵanda kóp. 2021 jyly respýblıkalyq olımpıadada 122 qatysýshy altyn, 214 kúmis jáne 349 qola medal jeńip aldy.
Eske sala keteıik, respýblıkalyq olımpıadanyń mektepishilik kezeńine 16 pán boıynsha 266 805 oqýshy, aýdandyq kezeńge 96 443 oqýshy, oblystyq kezeńge 14 369 oqýshy qatysty, al aqtyq kezeńde 2 070 oqýshy júldeli oryndardy sarapqa saldy.
Respýblıkalyq olımpıadanyń jeńimpazdary men júldegerleri týraly tolyq aqparat https://daryn.kz saıtynda jarııalanady.
