Bilim berý nysandarynda órt qaýipsizdigi erejesiniń buzylýyna jol bergeni úshin 3,5 myńnan astam laýazymdy tulǵa ákimshilik jaýapkershilikke tartyldy
ASTANA. Qyrkúıektiń 2-si. QazAqparat /Ernur Aqanbaı/ - Jańa oqý jylyna daıyndyq qarsańynda elimizdegi bilim berý nysandarynda órt qaýipsizdigi erejesiniń buzylýyna jol bergeni úshin 3,5 myńnan astam laýazymdy tulǵa ákimshilik jaýapkershilikke tartyldy. Bul týraly búgin Úkimet otyrysynda Tótenshe jaǵdaılar mınıstri Vladımır Bojko málim etti.
«Tótenshe jaǵdaılar mınıstrligi jańa oqý jylyna daıyndyq qarsańynda bilim berý nysandaryna jospardan tys tekserýler júrgizdi. Tekserýdiń nátıjesi órt qaýipsizdigin saqtaýda oń ózgeristerdiń baryn kórsetip otyr. Alaıda, tekserilgen nysandardyń kópshiligi órt qaýipsizdigi kóńilge qonbaıtyn jaǵdaıda jumys istep jatyr. 2086 bilim berý nysany tekserildi, 9199 órt qaýipsizdiginiń normasy men erejesi buzylǵany anyqtaldy. Ákimshilik jaýapkershilikke 3,5 myńnan astam laýazymdy tulǵa tartyldy. Olarǵa 4 mln. 542 myń teńge somasynda aıyppul salyndy», dedi V. Bojko.
Onyń sózine qaraǵanda, aǵymdaǵy jyly bilim berý nysandarynda 17 órt tirkelgen. Nátıjesinde 400 myń teńgeniń materıaldyq shyǵyny kelgen.
