Bilim berý mekemeleriniń jumys júrgizý strategııalaryn jandandyrý qajet - Prezıdent

ASTANA. QazAqparat - Memleket basshysy derbes bilim berý mekemeleri - «Nazarbaev Ýnıversıteti» men «Nazarbaev zııatkerlik mektepteriniń» jáne «Nazarbaev qorynyń» Joǵary Qamqorshylyq keńesiniń otyrysyna qatysty, dep habarlady búgin Aqordanyń baspasóz qyzmeti.

Jıynda birqatar mańyzdy máseleler talqylandy. Atap aıtqanda, ýnıversıtetti jáne zııatkerlik mektepterdi damytý perspektıvalary, oqý oryndaryna qujat tapsyratyn talapkerler sanyn kóbeıtý, Qamqorshylyq keńesiniń jańa quramyn jasaqtaý úshin irikteý ótkizý jaıy, sondaı-aq uıymdastyrý aspektileri qaraldy.

Qazaqstan Prezıdenti ǵylymı-zertteý úderisin damytyp, ýnıversıtettiń halyqaralyq baılanystary aıasyn keńeıtýdiń mańyzdylyǵyna nazar aýdardy, sondaı-aq búkil elimizdegi 20 zııatkerlik mekteptiń tıimdi jumys júrgizip jatqanyn aıtty.

«Zııatkerlik mektepterdiń barlyq túlekteri elimizdegi jáne shetelderdegi joǵary oqý oryndaryna túsip jatyr. Olardyń 90 paıyzdan astamy - memlekettik granttar men ýnıversıtetterdiń bilim berý granttarynyń ıegerleri. Bilim berý mekemelerine tyń serpin berý úshin biz olardyń odan ári jumys júrgizý strategııalaryn jandandyra túsýimiz qajet», - dedi Nursultan Nazarbaev.

Memleket basshysy ýnıversıtet jeti jyldan bergi jumys barysynda eleýli tabystarǵa jetip, osy kezeń ishinde myńǵa jýyq stýdentti túletkenin atap ótti.

Sondaı-aq, jıynda «Nazarbaev Ýnıversıteti» derbes bilim berý mekemesiniń prezıdenti Sh.Katsý sóz sóıledi.