Bilim berý mekemeleriniń basshylaryn taǵaıyndaýǵa arnalǵan konkýrs jarııaly túrde ótti

Jıynda aldymen sóz alǵan qala basshysy laýazymdy qyzmetter úshin jarııalanǵan ashyq konkýrsqa qatysýǵa talap bildirgenderdiń kóp bolǵanyn tilge tıek etti.

- Jalpy, mektep dırektory qyzmetine 57 úmitker bolǵan edi. Onyń ekeýi oblystyq bilim basqarmasynyń kelisimin ala alǵan joq. Ekeýi konkýrsqa qatysýdan bas tartty. Qalǵanynyń bári osynda. Jalpy mektep dırektory qyzmetine 48 úmitker bar. Sondaı-aq, qosymsha bilim berý uıymdarynyń basshysyna - 7, balabaqsha meńgerýshisi qyzmetine - 2 úmitker nıet bildirip otyr, - dedi Іlııas Ispanov. Jıyn barysynda sóz alǵan qalalyq bilim bóliminiń basshysy, konkýrstyq komıssııanyń tóraıymy Lázzat Orazbaeva 21 bilim berý mekemesiniń burynǵy basshylarynyń biri basqa qalaǵa kóshýine, ekinshisi otbasy jaǵdaıyna baılanysty qyzmetten ketkenin, qalǵany zeınet demalysyna shyqqanyn aıtty. Konkýrs uzaqqa sozyldy. 57 úmitkerdiń arasynda komıssııa músheleriniń saýaldaryna naqty, tııanaqty, júıeli jaýap bergender de kóp boldy. Sondaı-aq, qarapaıym saýaldardyń ózine jaýap bere almaı, kúmiljigender de bar. Ásirese, olar «Oqý jospary nege negizdelip jasalady?» «Mektep memlekettik qyzmettiń qandaı túrlerin kórsetedi?», «100 naqty qadam - Ult josparynda» mektep úshin qandaı mindet júktelgen?», «Balanyń pikiri neshe jastan bastap eskeriledi?» syndy saýaldarǵa jaýap bere almaı qınaldy. Konkýrsqa qatysýshylardyń arasynda qalaǵa qarasty aýyldyq okrýgtiń ákimi, kolledj dırektory, kolledj dırektorynyń orynbasary, mektep dırektorlary da bar. Komıssııa músheleriniń saýaldaryna jan-jaqty jaýap bergen Sazdy aýyldyq okrýginiń ákimi Amangeldi Ońǵarbaevqa komıssııa músheleriniń biri: - Nelikten ákim mektepke barǵysy keledi? Qansha degenmen, ákimdik laýazym mektep dırektory qyzmetinen joǵary ǵoı, - dedi. - Men - pedagogpin. 14 jyl boıy bilim berý salasynda jumys istedim. Meniń oıymsha, meniń ornym - mektep. Balalarmen jumys istegendi janym súıedi, - dedi Amangeldi Ońǵarbaev. №17, №25 mektepterdiń basshylyq qyzmetterine úmitker bolǵan ol №17 mekteptiń basshysy qyzmetine taǵaıyndaldy. Saýaldarǵa múdirmeı, saýatty, naqty jaýap bergenderdiń biri - oblystyq bilim basqarmasy ákimshilik jumystar bóliminiń basshysy Shamshat Jubaı. Ol - qalalyq Oqýshylar saraıy dırektory laýazymyna úmitker. - 31 jyl pedagogıkalyq eńbegimniń 13 jylyn memlekettik qyzmetke arnadym, 10 jyldan beri oblystyq bilim basqarmasynda bólim basshysy bolyp eńbek etemin. Jumysymnan eshkim qýyp jatqan joq. Degenmen, ár adamnyń óz tańdaýy bar. Sol sebepti, baǵymdy synap kórgim keldi. Balalarmen jumys istegendi jaqsy kóremin. Jalpy, men ónerdi súıemin. Eńbek jolymdy Oıyl qazaq orta mektebinde aǵa tálimger bolyp bastadym. Ol kezde mekteptiń bı úıirmesiniń de, án úıirmesiniń de jetekshiligin qosa atqara beretin edik. Kolledjde oqyǵanymda da barlyq úıirmelerge qatysyp, belsendi boldym. Keıin ol kezdegi túlekter úshin ortaq mindet boıynsha aýylda eki jyl eńbek ettim. Odan soń Almatydaǵy Óner ınstıtýtyna túsken edim, biraq ata-anam ruqsat bermeı qoıdy. Maqsatym - daryndy, ónerli oqýshylardyń shyǵarmashylyq qabiletin damytý, olarǵa qoldaý kórsetý, - deıdi Shamshat Jubaı. Konkýrs qorytyndysynda oblystyq bilim basqarmasy ákimshilik jumystar bóliminiń basshysy Shamshat Jubaı Aqtóbe qalalyq Oqýshylar úıiniń dırektory qyzmetine laıyq dep tanyldy. - Laýazymdy qyzmetter úshin ótkiziletin konkýrstardy jarııaly, ashyq túrde ótkizý burynnan da oıymda bar edi. Sol oıymdy Aqtóbe qalasynyń ákimi Іlııas Ispanovqa aıtyp edim, ol qýana quptady. Jalpy, laýazymdy qyzmetter úshin uıymdastyrylǵan konkýrstarǵa baılanysty jurt arasynda alyp-qashpa áńgime kóp bolady. Maqsat - mundaı áńgimeniń negizsizdigine, úmitkerlerdiń bárine birdeı ortaq talaptar qoıylatynyna jurtshylyqytyń kózin jetkizý, ashyqtyq pen jarııalylyqty qamtamasyz etý. Sol sebepti, konkýrsqa «Nur Otan» partııasy qalalyq fılıalynyń, prokýratýranyń, oblystyq bilim sapasyn qadaǵalaý departamentiniń ókilderin, ata-analardy, jýrnalısterdi shaqyrdyq. Konkýrstyń bir ereksheligi, qaladaǵy myqty mektepterge de dırektorlar qajet boldy. №32 mektep-gımnazııasyna №52 mekteptiń dırektory Aıjan Jambylova, №51 mektep-gımnazııaǵa №15 mekteptiń dırektory Gúlnazııa Dáribaeva taǵaıyndaldy, - deıdi qalalyq bilim bóliminiń basshysy Lázzat Orazbaeva. Gúljan BAZYLQYZY.