Bilim berý mekemelerindegi týberkýlezdiń aldyn alý sharalary júıeli túrde júrgizilip jatyr - M. Súleımenova
ASTANA. 3 naýryz. QazAqparat /Aınur Kenebaeva/ - Elimizdiń bilim berý mekemelerindegi týberkýlezdiń aldyn alý sharalary júıeli túrde júrgizilip jatyr.
Búgin Astanada týberkýlezdiń aldyn-alý men emdeý máselesine arnalǵan baspasóz máslıhatynda Astana qalasy Bilim basqarmasynyń bólim bastyǵy Mádına Súleımenova osylaı aıtty.
Onyń aıtýynsha, qazirgi tańda Astana qalasynda 225 bilim berý mekemesi jumys isteıdi. Sonyń ishinde 80 mektep, 87 balabaqsha men 37 kásiptik bilim berý uıymdary bar. "Bilim berý mekemelerindegi týberkýlezdiń aldyn alý sharalary óz deńgeıinde júıeli túrde júrgizilip jatyr. Bilim berý mekemelerinde sabaqtan tys týberkýlez qaýpin aldyn alý sharalary keshendi túrde qolǵa alynǵan", - dedi ol.
Onyń sózine qaraǵanda, barlyq bilim berý mekemelerinde týberkýlezben kúres, ony boldyrmaý joldary jaıynda maǵlumat beretin dárigerlik nusqaýlyqtar men aqparattyq anyqtamalyqtardyń arnaıy buryshy bar. Jas urpaqty salaýatty ómirge baýlý jáne keseldi derttiń taralý joldary jaıynda aqparattandyrý maqsatynda «óz densaýlyǵyń - óz qolyńda», «aýyrǵan jaǵdaıda ne isteý qajet?» taqyryptarynda shyǵarma, dıktant jazý, sondaı-aq mektepterge bekitilgen dárigerlerdiń qatysýymen tárbıe saǵattary, ashyq sabaqtar men dóńgelek ústelder uıymdastyrylady. M. Súleımenova týberkýlez dertinen saqtaný men aldyn alý joldaryn qoǵamdy jan-jaqty aqparattandyrý isi arqyly júrgizý aıasynda «Adam saýlyǵy - qoǵam saýlyǵy» taqyrybynda qalalyq semınar bolǵandyǵyn erekshe atap ótti.
«Týberkýlezge shaldyqqan balalarmen jumys jasaıtyn bilim berý mekemeleri nátıjeli jumys jasaýda. № 32 mektep gınazııasyna qarasty týberkýlezge qarsy dıspanserde qazirgi tańda 38 bala oqyp, saýyǵyp jatyr. Onyń ishinde 23 bala qazaq synybynda, 15 bala orys synybynda oqıdy. Munda 12 muǵalim sabaq beredi, úıirmeler jumys isteıdi. Balalar bilim alýmen qatar emdelip, rýpýblıkalyq Býrabaıdaǵy saýyqtyrý ortalyǵyna jiberiledi. Balalar tolyq emdelip bolǵan soń jalpy bilim berý mektepterine qabyldanady. Bıylǵy jyly «Balapan» baǵdarlamasy boıynsha № 45 Samal saýyqtyrý balabaqshasy ashylǵan bolatyn», - dedi M. Súleımenova óz sózinde.
