Bilim berý mekemelerinde ata-analardan san alýan alym-salymdardy alýǵa ruqsat joq - Á. Bımendına
ASTANA. 11 qazan. QazAqparat - Astanadaǵy bilim berý mekemelerinde san alýan alym-salymdarǵa tyıym salynǵan. Bul týraly búgin QR Ekonomıkalyq jáne sybaılas jemqorlyqqa qarsy kúres agenttiginiń bastamasymen ótken semınar-dáriste Astana qalasy Bilim berý basqarmasynyń bastyǵy Ásıma Bımendına málim etti.
Onyń habarlaýynsha, búginde basqarmanyń tártiptik komıssııasynda sybaılas jemqorlyq máseleleri jan-jaqty qaralady. Memlekettik satyp alýlardy oryndaý boıynsha san alýan jıyndar da ótkizilip, oǵan bilim berý mekemeleriniń esep-qısapshylary shaqyrylady.
«Degenmen, tártip buzý faktileri áli de tyıylar emes. Máselen, bilim berý mekemesiniń bir basshysy ózine salynǵan aıyppuldy ózge bireýdiń esepshotynan «tólese», ekinshisi ata-ananyń balabaqsha stendin jasap beremin degen kómeginen bas tartpaı, on myń teńgesin de alýǵa arlanbady. Sol úshin qyzmet ornymen qosh aıtysty. Bul qarapaıym bilmestik qoı. Mekeme basshylary onyń tártip buzýshylyq ekenin túsinbeı me? Qalaı ózi? Osy oraıda aıta keter jaıt, jyl saıyn qyrkúıektiń basynda biz arnaıy buıryqty shyǵaryp otyramyz. Oǵan sáıkes, jóndeý jumystary, oqý-quraldary men qandaı da bir teatr bıletterine aqsha jınaýǵa tyıym salynǵan», - dep atap kórsetti Á. Bımendına.
