Bilim berý granttary baǵdarlamasy túlekteriniń sany 14 adamǵa tolyqty
ALMATY. 6 maýsym. QazAqparat - Almatyda E. Tátishev atyndaǵy «Erjan» qoǵamdyq qorynyń Bilim berý granty baǵdarlamasynyń 2013 jylǵy túlekterine qurmet kórsetý saltanaty ótti.
Bıyl elimizdiń oqý oryndarynda tabysty bilim alyp shyqqan 14 shákirtaqy alýshy qordyń bilim berý granty baǵdarlamasy túlekteriniń qataryn tolyqtyrdy. Onyń beseýi turmysy tómen otbasylardan shyqqan balalarǵa, úsheýi balalar úıiniń túlekterine, altaýy múmkindigi shekteýli túlekterge berildi.
Bilim berý granttarynyń birinshi baǵdarlamasy 2007 jyly, al qalǵan eki baǵdarlama 2008 jyly iske qosylǵan bolatyn. 2011 jáne 2012 jyldarda qorda bitirýshilerdiń eki toby boldy. Bilim berý baǵdarlamasy sheńberindegi qordyń 21 túleginiń qataryna bıyl 14 túlek qosylyp otyr. Jalpy 2007-2012 jyldar aralyǵynda bilim berý granty baǵdarlamasyna 146 264 090 teńge jumsaldy. Osy jyldar ishinde barlyǵy 75 grant bólindi.
Qor baǵdarlamalarynyń biregeıligi - tek laıyqty bilim alýǵa múmkindik berip qana qoımaı, shákirtaqy alýshylardyń jan-jaqty damýy men kásibı daǵdylaryn qalyptastyrýǵa jaǵdaı jasaýynda. Bilim berý granttary búkil oqý kezeńindegi oqý aqysyn tóleýmen qosa, aı saıynǵy shákirtaqymen, jataqhanada turý qunyn jáne ózge qaladan kelgen shákirtaqy alýshylarǵa jylyna bir ret úıine baryp qaıtý jolynyń aqysyn qamtamasyz etedi.
Kóptegen shákirtaqy alýshylar búkil álemniń stýdentterin biriktiretin AISEC, SIFE jáne t.b. túrli halyqaralyq baǵdarlamalarǵa belsendi qatysyp otyrady. Olar óz oqý oryndarynyń úzdik stýdentteri bolyp tabylady jáne almasý baǵdarlamalary boıynsha 1-2 semestr aralyǵynda sheteldik ýnıversıtetterde bilimderin jetildire alady.
