Bilim berý - basty qundylyq
ASTANA. QazAqparat - Sarapshy-mamandar «Daǵdarys degen álsiz bılik úshin quldyraý, al kúshti bılik úshin jańa múmkindik» degen qanatty sózdi jıi aıtady.
Daǵdarys jaǵdaıynda Qazaqstan týraly sóz etsek, onyń bılikke de, halyqqa da jańa múmkindikter týǵyzyp otyrǵanyn kóremiz. Máselen, keıbir sáýegeıler ekonomıkalyq ahýal qıyndaǵan kezeńde elimizdegi mektepter men balabaqshalar qurylysy toqtap qalady dep boljaǵan. Alaıda elimizde «Nurly jol» baǵdarlamasy sheńberinde mektepter men balabaqshalar salý qarqyny báseńdegen joq. Bul týraly 23 qarashadaǵy Úkimettegi selektorlyq otyrysta bilim jáne ǵylym mınıstri Aslan Sárinjipov habarlady.
Mınıstr bıyl mektepter men balabaqsha salýǵa Ulttyq qordyń esebinen 17,3 mlrd. teńge bólingenin málimdedi. Ol aqsha 51 bilim berý nysanynyń qurylysyn qarjylandyrýǵa jumsalǵan. Sonyń ishinde 34-i mektepter (26-sy - úsh aýysymdyq, 8-i - apattyq), 17-si - mektepke deıingi bilim berý mekemeleri. Olardyń báriniń qurylysy 2016 jyly aıaqtalady. A. Sárinjipov barlyq nysandar boıynsha qurylys jumystary 2 aıǵa alǵa ozyp kele jatqanyn jetkizdi. «51 nysannyń qurylysyna tek jergilikti kompanııalar tartyldy. Otandyq kásiporyndar shyǵarǵan materıaldar qoldanylýda. Sondyqtan bólingen qarajattyń daǵdarysqa qarsy kúreste asa joǵary tıimdilikke aparatyny daýsyz» dedi mınıstr.
Atap aıtarlyǵy, Úkimet basshysy Kárim Másimov selektorlyq otyrysta mektepterdegi oryn jetispeýshiligine, elimizde qansha apatty mektepter baryna nazar aýdardy. Máselen Bilim jáne ǵylym mınıstriniń aıtýynsha, qazirgi kezde Qazaqstanda 40 apatty mektep ber eken. Aslan Sárinjipov bul mektepterdi salý 2016 jylǵa josparlanǵanymen oǵan basqa salada ıgerilmegen qarajatty aýdarýdy surady. «Elimizdegi apatty jaǵdaıdaǵy 40 mekteptiń ornyna jańadan 40 mektep salýǵa shamamen 40 mlrd. teńge qajet. Bul eki jyldy qosa alǵandaǵy esep. Eger de basqa salalarda ıgerilmegen aqsha bolsa, biz qosymsha ony ıgerýge daıynbyz. Óıtkeni bizde qajettilik bar» dep málimdedi mınıstr. Sonymen qatar, onyń aıtýynsha, 2015 jyly elimizde 340 myń bala 1-shi synyptyń tabaldyryǵyn attaǵan. Bıyl byltyrǵa qaraǵanda respýblıkada 400 myń bala kóp týylǵan. Demek 5 jyldan keıin 1-shi synypqa 400 myń bala barady degen sóz.
Máseleniń kúrdeli ekeni daýsyz. Biraq Úkimet ony memlekettik-jekemenshik áriptestik tájirıbesi arqyly sheshýdi oılastyrýda. Qazir kóptegen óńirlerde bul tájirıbe iske asyrylyp jatyr. Mysaly, mektepke deıingi tárbıe jáne bilim berý salasynda 18 balabaqsha salynýda. Onyń ishinde 11-i - Shyǵys Qazaqstan, 3-ýi - Mańǵystaý, 3-ýi - Soltústik Qazaqstan oblystarynda. Qyzylorda oblysy da bul tájirıbeden tys qalǵan joq. Quzyretti mınıstrlik habarlaǵandaı, 2016 jyly oblystaǵy 11 jalpy bilim beretin mekteptiń, 600 oryndyq kásiptik-tehnıkalyq kolledjdiń qurylysyna jekemenshik ınvestıtsııa tartý qarastyrylýda.
