Bilim basqarmasy: Sharyn shatqalyna ekskýrsııa mektep ákimshiligimen kelisilmegen
ALMATY. QazAqparat - Sharyn shatqalynda bolǵan qaıǵyly oqıǵa kezinde onda Almaty qalasyndaǵy №199 gımnazııanyń 8 oqýshysy bolǵan, dep habarlaıdy qalalyq bilim basqarmasynan.
«Aǵymdaǵy jyldyń 29 mamyrynda Sharyn shatqalynda qaıǵyly oqıǵa boldy. Ókinishke oraı, ekskýrsııaǵa barǵandardyń arasynda Almaty qalasyndaǵy №199 gımnazııanyń 8 oqýshysy bolǵan. Olarmen birge oqýshylardyń 5 ata-ana jáne 3 muǵalim boldy. Oqıǵa saldarynan bir oqýshy jáne pán muǵalimi qaıtys bolǵan. Oqıǵa ornynda bolǵan taǵy bir oqýshy izdestirilip, ol tabyldy jáne aýrýhanaǵa jiberildi» delingen habarlamada.
Málimetke saı, balalar men zardap shekkenderge qajetti medıtsınalyq jáne psıhologııalyq kómek kórsetilýde. Ekskýrsııa kanıkýl ýaqytynda bolǵandyqtan mektep ákimshiligimen kelisilmegen. «Bilim basqarmasy oqıǵanyń mán-jaıyn tolyq zertteýde. Qaıtys bolǵandardyń otbasylaryna kóńil aıtamyz jáne zardap shekkenderdiń tezirek saýyǵýyn tileımiz. Qurmetti ata-analar, sizderge kanıkýl kezeńinde qaýipsizdik sharalaryn saqtaý qajettigin eske salamyz!» dep túıindelgen habarlama.