Bilim basqarmasy anasynyń ruqsatynsyz balalaryn asyraýshyǵa berý sebebin túsindirdi
KÓKShETAÝ. QazAqparat-Aqmola oblysy bilim basqarmasynyń mamandary ata-anasynyń ruqsatynsyz apaly-sińili qyzdardy bala asyrap alýshy otbasyna berý sebebin túsindirdi, dep habarlaıdy QazAqparat tilshisi.
Eske sala keteıik, jaqynda apaly-sińilili qyzdardy ata-anasy bola tura bala asyrap alýshy otbasyna tapsyrǵany týraly aqparat taraǵan bolatyn. Osyǵan baılanysty Kókshetaý qalalyq bilim bóliminiń qamqorshylyq jáne qorǵanshylyq organdarynyń deregi boıynsha 2011 jáne 2013 jyly týǵan apaly-sińilili qyzdar 2017 jyldyń 26 maýsymynan bastap, ata-anasynyń qamqorynsyz qalǵan bolyp esepke alyndy.
Kámelettik jasqa tolmaǵan qyzdardyń anasy 2017 jyldyń 26 maýsymynan bastap Aqmola oblysynyń jasóspirimder isi boıynsha mamandarylǵan aýdanaralyq sotynyń sheshimimen ata-analyq quqyǵynan aıyrylǵan bolatyn.
QR «Neke jáne otbasy týraly» kodeksine sáıkes qamqorshylyq jáne qorǵanshylyq organdary bir aıdyń ishinde balalardy jaqyn týystaryna, eger ondaı múmkindik bolmasa jetimder úıine tapsyrýdy sheshý kerek.
Alaıda, bul joly apaly-sińilili qyzdardyń týǵan anasy qarsylyq tanytyp, ózinen basqa týystary joq ekenin aıtty. Sol sebepti, qyzdardyń ata-ana quqyǵynan aıyrylǵan anasynan basqa týystaryn anyqtaýǵa múmkindik bolmady.
Oǵan qosa, 2017 jyldyń 16 aqpany men 24 shildesi aralyǵynda «Kámelettik jasqa tolmaǵandardy beıimdeý ortalyǵy» mekemesinde bolǵan kezderinde qyzdardy týystary izdep kelgen joq.
«Osyǵan oraı, Kókshetaý qalasy ákimdiginiń 2017 jylǵy 24 shildedegi qaýlysymen balalarǵa asyrap alýshy anyqtaldy.
Al, keıin ýaqy óte kele 2017 jyldyń 2 qarashasynda Kókshetaý qalalyq bilim bólimine apaly-sińilili qyzdardyń anasynyń týǵan ápkesinen kámelettik jasqa tolmaǵan jıenderin asyrap alý týraly ótinish túsken. Qamqorshylyq jáne qorǵanshylyq organdary kelinshektiń ótinishine sáıkes usynylǵan qujattaryn teksere kele, onyń otbasylyq tabysy bar-joǵy 49000 myń teńge ekenin anyqtady. Sol sebepti, QR bir adamnyń kúnkóris deńgeıi 24 459 teńge ekenin eskere kele, QR «Neke jáne otbasy týraly» kodeksiniń 122 babynyń 10 bóligi negizinde qyzdardy anasynyń ápkesine asyrap alýshy retinde rásimdeýden bas tartty», dep túsindirdi bilim basqarmasynyń mamandary.
Qazirgi kezde, apaly-sińili qyzdar Kókshetaý qalasy ákimdiginiń qaýlysymen bektilgen bala asyrap alýshy otbasynda tárbıelenýde. Al, týǵan anasynan ata-ana quqyǵyn qaıtarý týraly sotqa aryz túsken joq.
