Bilim basqarmalary azyq-túlik jetkizýshilermen negizsiz sharttar jasasqan - Antıkor

ASTANA. QazAqparat – Bilim basqarmalary azyq-túlik jetkizýshilermen negizsiz sharttar jasasqan. Bul jaıynda Sybaılas jemqorlyqqa qarsy is-qımyl agenttiginiń málimetinde aıtylǵan, dep habarlaıdy QazAqparat tilshisi.

Sybaılas jemqorlyqqa qarsy qyzmet Oqý-aǵartý mınıstrligine azyq-túlik jetkizýshilerine MektepMenu-ge qol jetkizýdi qamtamasyz etý boıynsha negizsiz sharttar jasasý tájirıbesin joıýdy usyndy. Jetkizýshiler Bólshek saýda jáne tamaqtaný qaýymdastyǵymen birge atalǵan máseleni kóterdi. Ótinishtiń máni Kundelik aqparattyq júıesimen biriktirilgen MektepMenu portalynda «mázir men taǵamdar» fotosýretterin ornalastyrý úshin negizsiz aqy alý boldy. Bilim jáne ǵylym mınıstriniń 2018 jylǵy 31 qazandaǵy buıryǵyna sáıkes mektepter tamaqtaný mázirin saıtqa jarııalaý kerek. Oqý-aǵartý mınıstrliginiń túsindirmesine sáıkes osy aqparattardy ınternet-resýrstarynda (Instagram, Facebook, Kundelik, Bilimal) tegin negizde ornalastyrýǵa bolady. Biraq 2022 jyldyń qarasha aıynan bastap, Bilim basqarmasynyń usynysy boıynsha azyq-túlik jetkizýshileri «NetInfoDistribution» kompanııasymen shart jasasyp, mázirdi MektepMenu portalynda aqyly negizde jarııalaı bastady. Jetkizýshiler mundaı qyzmetterge aqy tóleý qosymsha shyǵyn ekenin jáne ata-analarǵa aýyrtpashylyq túsetinin atap ótti

, - delingen agenttik aqparatynda.
Vedomstvo málimetinshe, elordalyq 94 mektepti tamaqpen qamtamasyz etetin 12 jetkizýshi anyqtaldy. Olar MektepMenu-ge qol jetkizý úshin 2,5 mln teńgeden astam qarajat tólegen. Jalpy 7 óńirde osyǵan uqsas faktiler 405 mekteppen jumys isteıtin 117 jetkizýshige de qatysty.

Kásipkerlerdiń quqyqtaryn qorǵaý maqsatynda Sybaılas jemqorlyqqa qarsy qyzmet Oqý-aǵartý mınıstrliginiń, Bilim basqarmasynyń, «Kundelik» JShS jáne «NetInfoDistribution» kompanııasynyń ókilderimen kezdesý ótkizdi. Kezdesý qorytyndysy boıynsha aqparattyq júıelerde tamaqtaný mázirin tegin ornalastyrýdy qaıta bastaý týraly sheshim qabyldandy. «NetInfoDistribution» JShS-men jetkizýshilerdiń sharttary buzyldy. Alaıda, memlekettik satyp alý portalynyń keıingi monıtorıngi mektep mekemeleriniń MektepMenu portalyna qol jetkizýde qyzmetter kórsetý boıynsha konkýrs ótkize bastaǵanyn jáne NetInfoDistribution-men sharttar jasasa bastaǵanyn kórsetti

, - dep atap ótedi agenttikten.
Máselen, elordalyq antıkor Bilim basqarmasymen qaıta kezdesý ótkizip, úshinshi tulǵalardy tartpaı tegin negizde tamaqtaný týraly aqparatty ornalastyrýdy usyndy. Nátıjesinde konkýrstar joıylyp, sharttar buzyldy. 5,5 mln teńgeni tıimsiz paıdalanýǵa jol berilmedi. Osyndaı faktiler 13 mln teńgeden astam somaǵa elimizdiń 169 mektebinde (Shymkent q., Almaty q., Shyǵys Qazaqstan, Aqtóbe, Pavlodar, Atyraý, Abaı, Qyzylorda, Qostanaı, Batys Qazaqstan oblystary) anyqtaldy.
Sybaılas jemqorlyqqa qarsy qyzmet Oqý-aǵartý mınıstrligine Kundelik portalynda oqýshylardyń tamaqtaný mázirin deldal kompanııalarsyz tegin ornalastyrý múmkindigin qamtamasyz etý jóninde hat joldady. Sebebi, úshinshi tulǵalardy tartý negizsiz shyǵyndar men bıýdjet qarajatyn tıimsiz paıdalanýǵa ákep soǵady. Sonymen qatar agenttik aýmaqtyq departamentterine MektepMenu qyzmetterine memlekettik satyp alýlardyń kúshin joıýdy baqylaý tapsyryldy.