Bilim alatyn jastar máselesiniń sheshim tabýy asa mańyzdy - prorektor Barshagúl Isabek

ShYMKENT. QazAqparat  - Elimizde joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý máselesi - búgingi ómirdiń ózekti taqyryby. Bul rette Elbasy Nursultan Nazarbaevtyń «Prezıdenttiń bes áleýmettik bastamasy» atty halyqqa úndeýi negizinde qolǵa alynatyn tyń bastamalar ustazdarǵa erekshe serpin berip otyr. Ońtústik Qazaqstan memlekettik pedagogıkalyq ýnversıtetiniń prorektory Barshagúl Isabek osyndaı pikir  aıtady, dep habarlaıdy QazAqparat tilshisi.

Barshagúl Qashqynqyzy 2022 jyldyń sońyna deıin stýdentterge 75 myń oryndyq jataqhana salynatyny jastardyń kóptegen áleýmettik máselelerin sheshedi dep otyr. Onyń pikirinshe qazirgi tańda sýdentter sany burynǵymen salystyrǵanda áldeneshe artqan.

«Jastardyń joǵary bilim alý kezinde turatyn jerleriniń jaıly bolýy olardyń bilim sapasynyń mazmunyn arttyratyny aqıqat. Osy turǵydan alǵanda bolashaqtyń tutqasyn ustar jastardyń basty máselesi ońtaıly sheshim tabatyny kóńil qýantty. Bizge serpin syılaǵan taǵy bir bastama - bilim grantynyń 20 myńǵa artatyny bolyp otyr.  Statatıstkalyq málimetterge súıensek,  qazir elimizdiń joǵary oqý oryndarynda 530 myńnan astam jas bilim alýda. Onyń 30%-ǵa jýyǵy memleket bólgen grantpen oqýda. Al, qosymsha myńdaǵan granttardyń bólinýi  memleket tarapynan kórsetilgen úlken qoldaý bolyp sanalady», - deıdi Barshagúl Qashqynqyzy.

Búginde 33 bakalavr men 1 magıstratýra baǵyty boıynsha mamandar daıarlaıtyn Ońtústik Qazaqstan pedagogıkalyq ýnıversıtetinde  4 myńǵa jýyq stýdent bilim alady. Prorektor aldaǵy oqý jylynda bilimgerlerdiń sanyn 6 000-ǵa jetkizýdi josparlanyp otyrǵanyn aıtady. Bul rette Elbasy úndeýindegi tyń bastamalar oqý ornynyń damyp órkendeýine sep bolatynyna senimdi.

«Memleket basshysy «men órkendegen Qazaqstan - eń aldymen memleketi ózin qorǵap, qoldaıtynyn, qamqorlyq jasaıtynyn sezinetin, tıisinshe elin jan júregimen súıetin, ózderine senimdi adamdar dep sanaımyn» degen sóziniń astarynda úlken mán-maǵyna jatyr. Sebebi, bul jastardyń durys, qalypty áleýmettik damýyna, baspanamen, jataqhanamen, laıyqty eńbekaqymen, qoljetimdi kásipkerlikpen, ınfraqurylymdyq gazben qamtylýyna erekshe kóńil aýdarýy jastardyń júregine jalyndaǵan jiger, qaıratyna kúsh-qýat qosty. Keleshektiń kórkem bolaryna kózderin jetkizdi. Senimderin nyqtaı tústi.  Jalpy úndeý - jastardyń áleýmettik múddesin kózdegen mańyzdy qujat  bolatynyna senimdimin», - deıdi ýnıversıtettiń oqý isi jónindegi prorektory Barshagúl Isabek.