Bılikti jónsiz synap, bedelin túsirip tastadyq – Májilis depýtaty

ASTANA. QazAqparat – Ákimder men mınıstrlerdiń jumysyn synar aldynda naqty dálelder bolýy qajet. Bılikke qatysty syn máselesin Májilis depýtaty Anas Baqqojaev Jibek Joly telearnasyndaǵy «JJ Talk» baǵdarlamasynyń efırinde qozǵady, dep habarlaıdy QazAqparat tilshisi.

«Biz ákimderdi jónsiz synaımyz. Olardy kim synaı alady? Ákimdiktiń bıýdjetin kórip, qansha qarajaty boldy, ol jumsaldy ma, jumsalmasa oǵan ne sebep - soǵan kóz jetkizip baryp aıtý kerek. Meniń aıtpaǵym, ókinishke qaraı, biz bılikti ábden, jónsiz synaı berip, onyń bedelin túsirip tastadyq. Eger ákimderdi kináli deıtin bolsaq, onda sózimizdi dáleldeýimiz qajet», – dedi Anas Baqqojaev telebaǵdarlama efırinde.

Onyń aıtýynsha, ákimder ortalyq atqarýshy organdar bekitken erejege súıenip jumys isteıdi.

«Ákim bıýdjettik kodekspen jumys isteıdi. Ol erejelerge Májilis tikeleı yqpal etedi. Eger júıeni jaqsartyp qoısa, onda ákimder eshqaıda bara almaıdy. Sózden iske kóship, jumys isteýimiz kerek. Qoǵamda kóp syn aıtylady. Mysaly, aýyl sharýashylyǵy salasyn alaıyq. Mınıstrlik jumys istemeıdi dep aıttyq, olaı aıtý úshin dálel kerek. Men aýyl sharýashylyǵy salasynyń mamanymyn, salaǵa qatysty problemalardy bilem», - deıdi ol.

Aıta ketsek, Jibek Joly telearnasyndaǵy «JJ Talk» baǵdarlamasynyń efırinde Májilis depýtattary el damýyna qatysty birqatar jaıttardy kóterip, usynystaryn aıtty.

Depýtat Erlan Saıyrov mindetin durys atqarmaǵan mınıstrlerdi ornynan alý jóninde usynys aıtylatynyn jáne naqty kandıdattardyń da baryn málim etti.

Odan bólek, halyq qalaýlysy burynǵy mınıstrlerdiń tabysy men dúnıe-múlkin tekserý kerektigin alǵa tartty.

Sondaı-aq, Májilis depýtaty Nurtaı Sabılıanov elimizde shaǵyn jáne orta bıznesti damytamyz desek nesıeniń 6-7 paıyzben berilýi tıistigin atap ótti.