Bilikti memlekettik qyzmetkerlerdiń jalaqysyn kóterýge mán berý kerek - professor A. Zabırova
ASTANA. QazAqparat - Bilikti memlekettik qyzmetkerlerdiń jalaqysyn kóterý kerek. Bul týraly búgin L.N. Gýmılev atyndaǵy EUÝ-dyń Áleýmettaný kafedrasynyń meńgerýshisi, professor Aıgúl Zabırova málim etti.
Onyń sózine qaraǵanda, ınstıtýtsıonaldyq reformanyń maqsaty - kásibı memlekettik apparat.
«Kóbisi memleketke tıesili jáne kóp máseleni memleket sheshetin elde bilikti memlekettik apparat qajet. Bul baǵyttaǵy sharalar merıtokratııa qaǵıdalaryn ary qaraı júıeli ári josparly, sondaı-aq tabandy túrde nasıhattaýdy kerek etedi. Osy turǵyda Sıngapýrdyń memlekettik qyzmeti merıtokratııany únemi ustaný, minsizdikke úzdiksiz umtylý men memlekettik qyzmetkerdiń mansabyn jáne joǵary jalaqysyn muqııat josparlaýdyń jarqyn úlgisi», - dedi professor Ortalyq kommýnıkatsııalar qyzmetindegi baspasóz máslıhatynda.
Osy oraıda ol naryqtyq reformalardy budan ary tabysty júzege asyrý úshin sátti ınstıtýtsıonaldyq orta qajet ekenin, tek myqty ınstıtýttar ǵana kúrdeli ózgerister kezeńinde jaqsy jumys istep, qoǵamdyq turaqtylyq pen sabaqtastyqty qamtamasyz ete alatyndyǵyn atap ótti.
A. Zabırovanyń paıymynsha, iri memlekettik qyzmetkerlerdiń, ıaǵnı mańyzdy sheshimderdi qabyldaıtyn adamdardyń jalaqysy ulttyq kompanııalardaǵy eńbekaqy standarttaryna jaqyn bolýy tıis.
«Búginde bilikti mamandardyń memlekettik qyzmetten ýaqyt óte kele ketip jatqandyǵyn baıqaýdamyz. Bul turǵydaǵy sebepterdiń biri - ol tómen jalaqyǵa baılanysty, ásirese, orta jáne joǵary deńgeıdegi qyzmetkerler ketip jatady. Sondyqtan birinshi kezekte jalaqy máselesin sheshý kerek sekildi»,-deıdi ǵalym.
Osy oraıda ol ortalyq jáne memlekettik organdarda apparatty qysqartý arqyly, bilikti qyzmetkerlerdiń jalaqysyn kóterý sheshimin qabyldaýǵa bolatyndyǵyn sóz etti.
