Bilikti mal dárigerleriniń sanyn arttyrý úshin qajetti múmkindikterdiń barlyǵyn qarastyrǵan jón - senator
ASTANA. Sáýirdiń 29-y. QazAqparat /Aıdar Ospanalıev/ - Elimizde aýyldyń áleýmettik jaǵdaıyn damytý jáne aýyldyq óndiristiń tıimdiligin kóterý boıynsha qabyldanyp jatqan is-sharalarǵa qaramastan, aýyl sharýashylyǵyndaǵy jumysqa degen qyzyǵýshylyq tómendep barady.
Onyń basty sebebi eńbekaqy deńgeıiniń tómendigi men áleýmettik jeńildikterdiń joqtyǵy. Bul pikirdi búgin senator Serik Aqylbaı Parlament Senatynyń jalpy otyrysynda Úkimet basshysy Kárim Másimovke joldaǵan depýtattyq saýalynda bildirdi, dep habarlaıdy QazAqparat.
«Bizdiń atymyzǵa Qaraǵandy oblysynyń aýdandyq máslıhat depýtattarynan aýyldyq eldi-mekenderde dıplomy bar biliktiligi joǵary mal dárigerleri mamandarynyń jetispeıtindigi jóninde arnaıy hat kelip tústi. Qaraǵandy oblysynyń jumys berýshileri 451 mal dárigeriniń jetispeıtindigin aıtyp otyr. Sondaı-aq onda 28 agronom, 19- ınjener-mehanık, 23 - aýyl sharýashylyǵy ónimderin qaıta óńdeý salasynyń ınjener-tehnologtary, 11 zootehnık tapshy. Sonymen qatar onda turǵyndardyń aýyldan qalaǵa turaqty aǵylý jaǵdaıy baıqalyp otyr. Jastar aýylǵa barýǵa yntasyz. Tájirıbeli kadrlar zeınettik jasqa shyǵa bastady», dedi senator.
Onyń málimetterine qaraǵanda, aýylda jumys istep jatqan 30 jastaǵy jastardyń mólsheri shamamen 9 paıyz. Bul 10-15 jyldan keıin aýyldyq eldi meken turǵyndary sanynyń kúrt azaıatyndyǵyn bildiredi. «Jastardy jáne tájirıbeli dıplomy bar, joǵary bilikti mal dárigeri mamandaryn tartý qajettigi búgin ǵana kóterilip otyrǵan másele emes. Túptep kelgende biz aıtyp otyrǵan máseleler úreı týdyratyn jáıt. Sebebi aýdan turǵyndarynyń negizgi bóligi mal sharýashylyǵymen aınalysady jáne sonymen ózderiniń otbasylaryn asyrap otyr», dedi depýtat.
Osyǵan qaraı ol mal dárigeriniń jaǵdaıyn jaqsartyp, aýyldyq eldi-mekendi kóterý úshin, olardy áleýemttik jaǵdaılaryn bilim jáne densaýlyq saqtaý salasy mamandarynyń qyzmetkerlerimen teńestirý sııaqty ózge de birqatar sharalardy atqarý qajettigin atap kórsetti.
