Bilikti kadrlardy daıarlaý isi memleketimizdiń damý úrdisine saı qalyptasýy qajet - G. Ábdiqalyqova (FOTO)
«Memleket basshysynyń «Qazaqstan jańa jahandyq ahýalda: ósim, reformalar, damý» atty Joldaýyn iske asyrýǵa, onyń ishinde daǵdarysqa qarsy jobalarǵa «Bolashaq» baǵdarlamasy boıynsha bilim alǵan mamandardyń atsalysýyna asa úlken mán berýimiz qajet. Sol sebepti, búginde elimizde bilikti kadrlardy daıarlaý isi memleketimizdiń damý úrdisine jáne Elbasy belgilip bergen basym baǵyttarǵa saı qalyptasýy qajet dep oılaımyn»,-dedi Memlekettik hatshy.
Atap aıtqanda, 2016 jyldan bastap stıpendııa alýǵa úmitkerlerge qoıylatyn talaptar kúsheıtildi. Ózgerister shet tilin bilý deńgeıine, dıplomnyń ortasha balyna, jumys ótiline qatysty engizildi. 163 pozıtsııadan turatyn basym mamandyqtar tizbesi jańartyldy, onyń 41 paıyzy ınjenerlik-tehnıkalyq mamandardy daıarlaýǵa baǵyttalǵan.
Komıssııa otyrysynda «100 naqty qadam» - Ult josparynyń jobalary úshin maqsatty tapsyrystar turǵysynda mamandardy naqty daıarlaýǵa baǵyttalǵan taǵylymdama baǵdarlamasy boıynsha «Bolashaq halyqaralyq stıpendııasynyń konkýrsyna qatysý úshin qyzmetkerler sanaty anyqtaldy.
Otyrysta G. Ábdiqalyqova «Bolashaq» stıpendııasyn iske asyrý tetiginiń tıimdiligin odan ary qaraı jetildirý jáne arttyrý baǵytynda birqatar tapsyrmalar berdi.
Otyrystan keıin tilshilerge bergen suhbatynda QR Bilim jáne ǵylym mınıstrligi «Halyqaralyq baǵdarlamalar ortalyǵy» AQ prezıdenti Ǵanı Nyǵymetov 2016-2020 jyldarǵa arnalǵan bes jyldyq damý strategııasy qabyldanǵanyn eske salyp ótti.
«Osy jyldan bastap, atalǵan strategııany iske asyrýǵa tolyqtaı kirisemiz. Bul qujattyń basty maqsaty - ol «100 naqty qadam» - Ult josparyna negizdelgen. Sondyqtan, bes reforma aıasynda jańa kadrlardy daıarlaýǵa erekshe mán berip otyrmyz. Sol sebepti, bizdiń taǵylymdama baǵdarlamasy boıynsha, sondaı-aq magıstratýra, doktorantýra baǵdarlamalary baǵytynda mamandardy daıarlaımyz. Bıylǵy jyly memleket tarapynan 700 stıpendııa bólindi jáne onyń kóbisi tehnıkalyq mamandyqtarǵa arnalǵan»,-dedi Ǵ. Nyǵymetov.
