Bilikti epıdemıologtar mańǵystaýlyq kombınattyń eńbek ujymymen kezdesti
Medıtsına ǵylymdarynyń kandıdaty, epıdemıolog Aınagúl Qýatbaeva men Asfendııarov atyndaǵy Qazaq ulttyq medıtsınalyq ýnıversıtetiniń juqpaly jáne tropıkalyq aýrýlar kafedrasynyń dotsenti Aınur Sadyqova eńbek ujymyna koronavırýs ınfektsııasy men vaktsınatsııaǵa qatysty barlyq suraqqa jaýap berdi.
Aınagúl Qýatbaevanyń aıtýynsha, búginde elimizde koronavırýs indetin juqtyrǵan 4 myńnan astam adam tirkelip jatyr.
«Álem boıynsha vaktsına biregeı sebeptermen ázirlenetinin atap ótý kerek. Epıdemıologııalyq ahýal men ólim-jitimge alyp keletin indet vaktsına ázirleýge májbúrleýi múmkin. Búginde adamzatqa janýarlar áleminen engen vırýstyń adamnan adamǵa juǵý áleýeti joǵary bolǵandyqtan, ázirlengen vaktsınalardyń úshinshi klınıkalyq zertteýi aıaqtalmaı jatyp, paıdalanýǵa enýin DDSU maquldady. Sebebi bul indet epıdemııa emes, pandemııaǵa aınaldy», - dedi epıdemıolog.
Onyń aıtýynsha, qazir Qazaqstanda 4 vaktsına alýǵa tańdaý bar.
«Alaıda keıbir vaktsınalardyń qory men sanynyń azaıýyna baılanysty óńirde vaktsına dozasy az bolýy ábden múmkin. Kezdesýdi tıimdi ótkizý úshin suraq-jaýap formatynda ótkizýdi jón kórip otyrmyz», - dedi ol.
Óz kezeginde Aınur Sadyqova úndi shtamynyń klınıkalyq kórinisteri ózgeshe ekenin aıtty.
«Bul aýrý ınfektsııalyq-toksıkalyq shokqa alyp kelip jatyr. Aldyńǵy hattamada jazylǵan koronavırýs kezeńderin bólip jasaǵanbyz. Qazirgi aýrýdyń kezeńderi múldem jyldam damyp, ınfektsııalyq shokqa ákelip jatyr. Sondyqtan aýyryp em izdegenshe, onyń aldyn alý áldeqaıda durys dep oılaımyz», - dedi ol.
Qyzmetkerlerdiń ishinde vaktsınanyń eki komponentin saldyrǵandar da barshylyq.
Mysaly, Eńbekti qorǵaý qyzmetiniń basshysy Shańytbaı Esenǵalıev kóktemde vaktsına alǵan.
Ol ekpe alsa da, mamandardyń pikirin tyńdaýǵa kelgenin aıtady.
Epıdemıolog mamandar qarapaıym tilmen túsindirip jatyr. Ótken jyldaǵy jaǵdaı qaıtalanbas úshin vaktsına alý kerek dep oılaımyn. Bizdiń mekemede myńnan astam adam vaktsına aldy. Taǵy myńnan astam qyzmetker osy aıda alady dep josparlap otyrmyz. Kelisip otyr. Qalǵandaryna túsindirý jumystary júrgizilip jatyr. Qazir ashyq derekkózderde de kóp paıdaly aqparat bar. Sondyqtan adam ózi men jaqyndarynyń densaýlyǵyn saqtaǵysy kelse, ekpe alýy kerek. Barlyq turǵyndy osyǵan shaqyramyn, - dedi Esenǵalıev.
Aıta keteıik, kombınat Energetıka mınıstrligine qarasty jumys isteıdi. Kombınatta 4 myńǵa jýyq qyzmetker eńbek etedi. Qazirgi tańda myńnan astam qyzmetker vaktsına alǵan. Taǵy myńǵa jýyq qyzmetker osy aıda alýdy josparlap otyr.
