Bılikti basyp alýǵa oqtalý kúdigimen qyrǵyz eliniń depýtaty tutqyndaldy
BІShKEK. QazAqparat - Qyrǵyzstan Respýblıkasynyń Bas prokýratýrasy QR Jogorký Keneshiniń depýtatyna qatysty qylmystyq is qozǵady.
Qanatbek Isaevke Qylmystyq kodekstiń birden úsh baby boıynsha aıyptar taǵylýda: «qylmysqa daıyndalý», «jappaı tártipsizdik» jáne bılikti kúshtep basyp alý nemese bılikti zorlyq-zombylyqpen ustap otyrý». Bul týraly kabar.kg saıty Bas prokýratýraǵa silteme jasap habarlady.
Qylmystyq is materıalyna sáıkes, Isaev uıymdasqan qylmystyq toptardyń keıbir múshelerimen sóz baılasqan, saılaý kezinde jappaı tártipsizdikterdi uıymdastyrýǵa belsendi áreketter jasaǵan jáne ózi jaqtas bolyp tabylatyn kandıdat saılaýdan ótpeı qalǵan jaǵdaıda bılikti kúshtep basyp alýdy iske asyrmaq bolǵan.
Quqyqqorǵaý organdarynyń málimetine sáıkes, ustalǵan tulǵalar aqshalaı syıaqy berip, sońy jappaı tártipsizdikter men qarýlanǵan qaqtyǵystarǵa ulasatyn josparlanǵan aktsııalarǵa qatysý úshin óz qatarlaryna adamdardy tartyp otyrǵan.
Qylmystyq is Qyrǵyzstan Respýblıkasy Memlekettik Ulttyq qaýipsizdik komıtetiniń Bas tergeý basqarmasyna joldandy.
2017 jyldyń 30 qyrkúıegi kúni Jogorký Keneshtiń depýtaty men ózge tulǵalarǵa qatysty QR Bas prokýratýrasy qozǵaǵan qylmystyq is aıasynda depýtat Qanatbek Isaev pen uıymdasqan qylmystyq toptardyń jekelegen músheleri tutqyndaldy. Qazirgi ýaqytta tergeý jumystary júrýde.
