Bılik tarmaqtary arasynda ókilettikterdi qaıta bólý usynysy aqpanda jasalady
ASTANA. QazAqparat - QR Parlamenti Májilisiniń depýtaty, bıliktiń tarmaqtary arasynda ókilettikterdi qaıta bólý jónindegi jumys tobynyń múshesi Gúlmıra Isimbaeva Májilis bul máselege qatysty óz usynysyn osy jyldyń aqpan aıynda jasaıtyndyǵyn málim etti, dep habarlaıdy QazAqparat.
«Qazirgi ýaqytta bıliktiń árbir tarmaǵy osyǵan qatysty ózderiniń usynystaryn ázirleýde. Parlamenttiń birqatar ókiletin ózgertý jáne qyzmetterin berýge qatysty usynystardy biz qazirgi ýaqytta daıyndaýdamyz. Joǵary sot óz baǵytynda, prokýratýra óz baǵytynda ázirleıdi. Sodan keıin qańtar aıynyń shamamen úshinshi onkúndiginde zańnamalyq aktilerge enetin ózgeristerdiń jalpy tujyrymdamasy ázirlenetin bolady. Aıta keterligi, jumys tobynyń quramyna ǵylymı-zańgerlik qoǵamdastyqpen qatar tájirıbelik-zańgerlik qoǵamdastyq ta kiredi. Bul talqylaýlar da ashyq ári jarııa ótedi», - dedi ol Májilistegi Úkimet saǵatynan keıin BAQ ókilderine.
Onyń aıtýynsha, qazirgi ýaqytta Parlament Májilisiniń jumys toby qurylyp, olar qyzmetterine kirisken.
«Naqty usynystar ázirlengen soń biz sizderge ony tanystyratyn bolamyz», - dedi Isimbaeva.
Aıta keteıik, 11-qańtarda Elbasy Nursultan Nazarbaev Memlekettik bıliktiń tarmaqtary arasynda ókilettikterdi qaıta bólý máseleleri jónindegi jumys tobyn qurý týraly ókimge qol qoıdy. Jumys tobyn Qazaqstan Respýblıkasy Prezıdenti Ákimshiliginiń Basshysy Ádilbek Jaqsybekov basqarady.
Onyń quramyna Qazaqstan Respýblıkasy Parlamentiniń, Úkimetiniń, Joǵarǵy Sotynyń, ózge de memlekettik organdardyń ókilderi, sondaı-aq, zańger qoǵamdastyǵy men ǵylymı-saraptamalyq qaýymdastyqtyń ókilderi kirdi.
Esterińizge sala ketsek, ótken jyldyń 15 jeltoqsanynda Qazaqstan Táýelsizdiginiń 25 jyldyǵyna arnalǵan saltanatty jıynda Memleket basshysy Nursultan Nazarbaev óz ókilettiligin Parlament pen Úkimet arasynda úılestirý máselesin kótergen bolatyn.
