Bılik pen qoǵam arasyndaǵy dıalog memleketti nyǵaıtady - Mashhýr Abý Eıd

AMMAN. QazAqparat – Qazaqstan Ulttyq qoǵamdyq senim keńesiniń tetikteri arqyly bılik pen qoǵam arasyndaǵy dıalogtyń durys jolyn tańdady. Iordanııanyń memlekettik «Petra» aqparat agenttiginiń saıası sholýshysy, Iordanııanyń Energetıka jáne mıneraldyq resýrstar mınıstrliginiń spıkeri Mashhýr Abý Eıd QR Prezıdenti Qasym-Jomart Toqaevtyń Ulttyq qoǵamdyq senim keńesiniń (UQSK) ekinshi otyrysynda sóılegen sózi týraly óz pikirin bildirdi.

M. Abý Eıd Ulttyq keńestiń tetigi arqyly bılik pen qoǵam arasyndaǵy dıalog memleketti nyǵaıtatynyna, sondaı-aq kóptegen elde bar ótkir áleýmettik máselelerdiń sheshimin tezdetip tabýǵa yqpal etetine senim bildirdi.

Kómekke muqtaj jandardy, kóp balaly otbasylardy qamtamasyz etý, mektep oqýshylaryna arnalǵan áleýmettik paket sekildi ekonomıkalyq jáne áleýmettik máselelerge keletin bolsaq, sarapshynyń pikirinshe, munyń barlyǵy memlekettiń óz azamattaryna degen shynaıy qamqorlyǵyn kórsetedi.

Sarapshynyń baǵalaýynsha, kóleńkeli ekonomıka álemiń kóptegen elderiniń máselesine aınalyp otyr. Sybaılas jemqorlyqty túbirimen joıý – kúrdeli jáne tutas sharalar keshenin talap etetin is, atap aıtqanda, derekter bazasynyń kómegimen olardyń áleýetti isker áriptesteriniń zańdylyǵyn baǵalaý jáne tekserý úshin kásiporyndarǵa quraldar berý. Mashhýr Abý Eıd atalǵan shara ekonomıkany edáýir jaqsartatynyna senimdi.

«Sodaı-aq, men Qylmystyq kodekstiń jala jabý týraly babynyń dekrımınalızatsııalanýy boıynsha bastamany qoldaımyn, sebebi, meniń oıymsha, memlekettiń turaqty damýyna yqpal etedi. Osy baptyń dekoımınalızatsııalaýy jýrnalısterge batyl túrde jumys isteýge múmkindik beredi», - dep atap ótti M. Abý Eıd.

Saıası sholýshy Qazaqstanǵa birneshe ret kelgen, onyń ishinde EXPO-2017 halyqaralyq kórmesine de kelgen bolatyn. Ol – «QazAqparat» HAA sarapshylar klýbynyń múshesi.