Bılik pen baılyq halyqqa tıesili bolatyn ádiletti qoǵam qurmaqpyz – Qazaqstan Halyq partııasy
«Bizdiń saılaýdaǵy baǵdarlamanyń ataýy – el úshin, jer úshin bılik halyqqa! Baǵdarlama úsh bólimnen turady. Ol bılik halyqqa, baı azamattar – baı memleket jáne ár otbasy memlekettiń qamqorlyǵynda. Bizdiń maqsat – el bıligi men baılyǵy Qazaqstan halqyna tıesili bolatyn ádiletti qoǵam qurý. Bizdiń formýlamyz – ádil Prezıdent, yqpaldy Parlament jáne halyqtyq Úkimet. Osy oraıda Májilis pen máslıhattarǵa naǵyz bılikti qaıtarý. Aýdıtorlar palatasyn jáne zańdy daıyndaıtyn ınstıtýtty Májilistiń quramyna engizý. Atqarýshy bılik aty zatyna saı bolyp qalý kerek. Ulttyq qaýipsizdik pen memlekettik til máselesin sheshý jolynda qandastardy qoldap otyrǵan jalǵyz partııamyz», – dedi Qazaqstan halyq partııasy tóraǵasynyń orynbasary Ashat Asylbekov Qazaqstan ulttyq arnasynda ótken saıası partııalardyń pikirsaıysy barysynda.
Onyń aıtýynsha, ádilettilik sottan bastalýy kerek.
«Sol úshin aýdandyq sottardy halyqtyń saılaýyn talap etip otyrmyz. Elimizde 3 mln kedeı adam bar. Sonymen qatar 8 mln adam nesıeden basyn kótere almaı otyr. Biz kedeılikpen kúres týraly zań qabyldaýdy talap etemiz. Qysqa ýaqytta azamattardy kedeılikten qutqaramyz jáne qaıyrshylyqty joıamyz. Biz usynyp otyrǵan salyq reformasynan keıin elimizde qýatty orta qalyptasady. Aýyl sharýashylyǵyn damytatyn arnaıy baǵdarlamamyz da bar. Sondaı-aq, analar men balalar, múmkindigi shekteýli jandar men jumysshylardyń jaǵdaıyn jaqsartamyz. Jańa eńbek kodeksin qabyldaımyz. Balaǵa beriletin járdemaqyny 13 myń teńgeden 70 myń teńgege deıin ósirsek, al tómengi jalaqyny 70 myń teńgeden 140 myń teńgege arttyramyz. Odan bólek, áıelderdiń 58 jasta zeınetke shyǵýyn talap etemiz. Jas otbasylarǵa memleket tarapynan ýaqytsha baspana bólinýi tıis. Al ıpoteka 3 paıyzdan aspaýy kerek», - deıdi ol.
Eske sala keteıik, «Qazaqstan» ulttyq arnasynyń tikeleı efırinde Májilis saılaýyna qatysatyn 7 saıası partııa ókilderiniń arasynda ótken pikirsaıys birer saǵat buryn aıaqtaldy. Oǵan «Amanat» partııasynan Elnur Beısenbaev, «Aýyl» halyqtyq demokratııalyq partııasynan Jıgýlı Daırabaev, Respublica partııasynan Syrymbek Taý, Qazaqstan Halyq partııasynan Ashat Asylbekov, «Baıtaq» jasyldar partııasynan Azamathan Ámirtaev, «Aq jol» demokratııalyq partııasynan Berik Dúısembınov, al Jalpyulttyq sotsıal-demokratııalyq partııasynan Nurlan Áýesbaev qatysty.
