Bılik ókilderi «Batys Eýropa - Batys Qytaı» jobasyna tartylǵan jumysshylardyń áleýmettik jaǵdaılary boıynsha BAQ-pen kezdesý ótkizdi
ASTANA. Tamyzdyń 18-i. QazAqparat - Búgin Qyzylordada QR Parlamenti Májilisiniń depýtaty Murat Ábenov pen QR Kólik jáne kommýnıkatsııa mınıstrligi Avtomobıl joldary komıtetiniń tóraǵasy Zamır Saǵynov, «Batys Eýropa - Batys Qytaı» jobasyna tartylǵan kásiporyndar jumysshylarynyń áleýmettik jáne turmys jaǵdaılaryn qamtamasyz etý máseleleri boıynsha buqaralyq aqparat quraldary ókilderimen kezdesý ótkizdi.
QR Kólik jáne kommýnıkatsııa mınıstrliginen málim etkendeı, óńirlik buqaralyq aqparat quraldary ókilderimen ótken kezdesý barysynda «Batys Eýropa - Batys Qytaı» halyqaralyq kóliktik dálizdi qaıta salý jobasyn iske asyrý barysyndaǵy áleýmettik-ekonomıkalyq máselelerdi sheshý jumysynyń nátıjeleri talqylandy.
Qyzylorda oblysynyń ýchaskesi boıynsha «Salını» AQ, «Todını» AQ, «Impreza» AQ jáne «Akkord Okan» BK kompanııalary bas merdigerler bolyp tabylady. Sondaı-aq jobaǵa 24 qazaqstandyq kompanııa tartyldy.
Búgingi tańda Qyzylorda oblysyndaǵy qurylys jumystary qarqyndy júrgizilýde. Aıta ketetin jáıt, jobany iske asyrý barysynda qoıylǵan basty talaptar - jańa jumys oryndaryn ashý jáne jergilikti halyqty jumyspen qamtamasyz etý. Osyǵan sáıkes, jobany iske asyrýǵa 15437 adam tartyldy, olardyń 8482-si jergilikti turǵyndar. Jumysshylardyń ortasha jalaqysy - 87000 teńge. Jumysshylardyń jalaqysy ýaqytyly tólenip, olar úsh mezgil tamaqtaný men qajetti turmys jaǵdaılarmen qamtamasyz etilgen.
Sonymen birge, jobany júzege asyrý barysynda jańa jumys oryndarymen qatar, orta jáne shaǵyn bıznestiń damýyna jańa múmkindikter ashyldy. Et, un, sút jáne kartop sııaqty azyq-túliktiń deni tolyqtaı jergilikti óndirýshilerden satylyp alynady.
Anyqtamalyq: «Batys Eýropa - Batys Qytaı» halyqaralyq kóliktik dálizdi qaıta salý jobasy boıynsha Qyzylorda oblysy arqyly ótetin joldyń uzaqtyǵy 817 shaqyrymdy quraıdy. Onyń 230 shaqyrymy І tehnıkalyq sanattaǵy, 587 shaqyrymy ІІ tehnıkalyq sanattaǵy bolady. Qurylys barysynda 8 eldi meken arqyly ótetin aınalma joldar, eki deńgeıli 14 jol aıyryǵy, 4 temir jol ótpesi, 48 kópir, 336 qubyr men maldar úshin 74 ótpe salynady. Jobanyń jalpy quny 188 mlrd. teńge.
