Bılik halyqqa árdaıym qulaq túrip otyrǵany jón - Qasym-Jomart Toqaev
«Biz egemen el retinde ósip-órkendeýimiz úshin memlekettiligimizdi nyǵaıtýymyz kerek. Zań ústemdigin jáne qoǵamdyq tártipti saqtaý barshaǵa ortaq mindet ekenin uǵynǵan jón. Halyqtyń bılikke degen qurmeti bolmasa – eldigimizge syn. Sondyqtan azamattarǵa, ásirese, jastarǵa memleketti syılaýdyń mán-mańyzyn túsindirý qajet. Osy rette taǵy da Abaıdyń murasyna zeıin qoıǵan abzal», - delingen Memleket basshysy maqalasynda.
Osy oraıda Q. Toqaev uly aqyn óziniń shyǵarmalarynda eldik muratty asqaqtatyp, ult birligin bıiktetkenin atap ótti. Ol ádiletti qoǵam qurý ıdeıasyn kótergen. Demek, Abaıdyń kózqarastary HHІ ǵasyrdaǵy Qazaqstan qoǵamy jáne onyń bereke-birligi úshin asa qundy. Hakim Abaıdyń ustanymdary órkenıetti memleket qaǵıdalarymen úndesedi. Zań ústemdigi, bıliktiń ashyqtyǵy men halyq aldynda esep berýi joǵary deńgeıde bolyp, memleket isine azamattyq qoǵam ókilderi belsene aralasqan jaǵdaıda ǵana ádilettilik berik ornyǵady.
«Meniń «Halyq únine qulaq asatyn memleket» atty tujyrymdamam dál osy ádiletti qoǵam ıdeıasyn damytý maqsatymen usynyldy. Bılik pen qoǵam arasyndaǵy syndarly dıalog memleketke degen senimdi nyǵaıta túsedi. Úkimet músheleri, sonyń ishinde mınıstrler men ákimder memlekettik jáne qoǵamdyq mańyzy bar máselelerge qatysty sheshim qabyldaǵan kezde azamattardyń usynystary men tilekterin eskerýi kerek. Muny Abaı meńzegen ádiletti qoǵam qalyptastyrýdyń birden-bir sharty dep bilemin», - dedi Prezıdent.
Sonymen qatar Memleket basshysy bul baǵytta Ulttyq qoǵamdyq senim keńesiniń mańyzdylyǵyna toqtaldy.
«Uly aqyn «Keleli keńes joǵaldy, El sybyrdy qolǵa aldy» degendi beker aıtqan joq. Elge bılik júrgizetinderge jurttyń kóńili tolmaıtynyn da ańǵartady. «Sybyrdan basqa syry joq, Sharýaǵa qyry joq» zamandastarymyz kóbeımes úshin bılik halyqqa árdaıym qulaq túrip otyrǵany jón. Memleket pen qoǵam ókilderi túıtkildi máselelerdi birge talqylap, sheshimin tabý maqsatynda Ulttyq qoǵamdyq senim keńesin qurdyq. Keńes formaldy sıpat alyp ketpeýi úshin onyń múshelerimen arnaıy kezdesip, jumysyn jiti qadaǵalap otyrmyn», - dep qadap aıtty Qasym-Jomart Toqaev.
«Abaı jáne HHІ ǵasyrdaǵy Qazaqstan» atty maqala «Egemen Qazaqstan» basylymynyń búgingi sanynda jarııalandy.