Bılik basynda otyrǵan azamattar memlekettik tilde sóılemeı, qazaq tiliniń damýy qıyn - Koreıa ókili
ASTANA. Naýryzdyń 26-sy. QazAqparat /Aıdar Ospanalıev/ - «Bılik basynda otyrǵan azamattar memlekettik tilde sóılemeı, qazaq tiliniń damýy qıyn», deıdi ońtústikkoreıalyq «Hangýk» shet tilderi ýnıversıtetiniń Ortalyq Azııa tilderi kafedrasynyń meńgerýshisi Son En Hý.
Bul týraly ol búgin Astanada «Qazaqstan Respýblıkasy men Koreıa Respýblıkasy: ǵylymı qaýymdastyq áriptestigi» atty halyqaralyq ǵylymı semınar barysynda málim etti, dep habarlaıdy QazAqparat.
«Qazaqstannyń qalalaryn aralyp kórseń, bazarlar men dúkenderde jalpy kópshilik júretin oryndarda qazaq tilinde sóılesetin azamattardy kezdestirýge bolady. Alaıda, bılik basyndaǵylardyń barlyǵy orys tilinde sóılegendi jón kóredi. Al qazaq tiliniń mártebesi ósýi úshin olar da tegis qazaq tilinde sóılegenderi jón. Qazaq tiliniń máselesin osyndan bastaý kerek», dedi kafedra meńgerýshisi.
